ഫ്ലെക്സിബിൾ ഇലക്ട്രോണിക്സ് – മാറ്റങ്ങളുടെ കാലം

മാറുന്ന സാങ്കേതിക വിദ്യ നമുക്ക് സമ്മാനിക്കുന്നത് അത്ഭുതങ്ങളാണ്.  പരീക്ഷണ ശാലകളില്‍ നിന്നും സാങ്കേതിക വിദ്യ അരങ്ങത്തേക്കെത്തുമ്പോൾ അത് ഉണ്ടാക്കുന്ന മാറ്റങ്ങൾ നിരവധിയാണ്.  വ്യാവസായിക രംഗത്ത് ഈ മാറ്റങ്ങൾ സൃഷ്ടിക്കുന്ന ചലനങ്ങൾ പ്രവചനാതീതമാണ്.  വളരെ വേഗത്തിലാണ് ഈ മാറ്റങ്ങൾ സംഭവിക്കുന്നത് എന്നതാണ് കൌതുകകരം.  ആധുനിക കാലഘട്ടത്തില്‍ ഏറ്റവും കൂടുതല്‍ മാറ്റങ്ങൾ സംഭവിക്കുന്ന മേഖലകളില്‍ പ്രമുഖമായതാണ് ഇലക്ട്രോണിക്സ് രംഗം. സാധ്യതകളുടെ വിശാല പ്രപഞ്ചം തുറന്നിട്ടുകൊണ്ട് ഭാവിയുടെ സാങ്കേതികവിദ്യ ആവുകയാണ് ഇപ്പോള്‍ ഇലക്ട്രോണിക്‌സ് മേഖല. ഇലക്ട്രോണിക്‌സ് എന്ന് മാത്രം പറഞ്ഞാല്‍ പൂര്‍ത്തിയാകില്ല,  ഫ്ളക്‌സിബിള്‍ ഇലക്ട്രോണിക്‌സ് എന്ന് തികച്ച് പറയണം.  ഇലക്ട്രോണിക്സിലെ മാറ്റങ്ങൾ ഒരിക്കല്‍ ഈ പംക്തിക്ക് വിഷയീഭവിച്ചതാണെങ്കിലും ഫ്ലെക്സിബിൾ ഇലക്ട്രോണിക്സ് എന്ന ഒരു ചിമിഴിനുള്ളില്‍ നിന്ന് മാത്രം ചിന്തിക്കുന്നത് ഇതാദ്യം. 

എന്താണ് ഫ്ലെക്സിബിൾ ഇലക്ട്രോണിക്സ്?

എന്താണ് ഈ ഫ്ളെക്‌സിബിള്‍ ഇലക്ട്രോണിക്‌സ് എന്ന് ചോദിക്കുന്നതിനേക്കാള്‍ എന്തല്ല എന്ന് ചോദിക്കുന്നതാണ് ഉചിതം. കളിക്കോപ്പ് മുതല്‍ പടക്കോപ്പ് വരെ വ്യാപിക്കുന്നതാണ് ഫ്ളെക്‌സിബിള്‍ ഇലക്ട്രോണിക്‌സിന്‍റെ ഉപയോഗമേഖലകള്‍. വിനോദം, വ്യവസായം, ആരോഗ്യം, പ്രതിരോധം, ഭക്ഷ്യ സംസകരണം വാര്‍ത്താവിനിമിയം തുടങ്ങി ഫ്ളെക്‌സിബിള്‍ ഇലക്ട്രോണിക്‌സിന് എത്തിപ്പെടാന്‍ സാധിക്കാത്ത മേഖലകള്‍ വളരെ വിരളം.   ഫ്ളെക്‌സിബിള്‍ ഇലക്ട്രോണിക്‌സ് എന്നാല്‍ പുതിയ തരം സര്‍ക്യൂട്ട് രൂപകല്‍പ്പനയാണ്. സാധാരണ, സര്‍ക്യൂട്ടുകള്‍ എന്ന് പറഞ്ഞാല്‍ കുറെ കേബിളുകളും കണ്ടക്ടറുകളും നിറഞ്ഞ ഒരു ബോര്‍ഡാണ് നമ്മള്‍ക്ക്  ഓര്‍മ്മ വരിക. എന്നാല്‍ ഫ്ളെക്‌സിബിള്‍ ഇലക്ട്രോണിക്‌സില്‍ സര്‍ക്യൂട്ടുകള്‍ പ്ളാസ്റ്റിക് പോലത്തെ പ്രതലത്തില്‍ പ്രിന്‍റ് ചെയ്യുകയാണ് ചെയ്യുക. പോളി അമൈഡ്, പോളി എസ്റ്റര്‍ എന്നിവയിലാണ് ഇത്തരത്തില്‍ സര്‍ക്യൂട്ടുകള്‍ പ്രിന്‍റ് ചെയ്യുന്നത്. വെള്ളി ഉപയോഗിച്ചാണ് ഇത്  ചെയ്യുന്നത്. കൂടാതെ വളരെ ചെറിയ, തലമുടി നാരിനേക്കാള്‍ കനം കുറഞ്ഞ കോപ്പര്‍ നാരുകള്‍ സര്‍ക്യൂട്ടുകളെ തമ്മില്‍ ബന്ധിപ്പിക്കാനായി ഉപയോഗിക്കുകയും ചെയ്യുന്നു. നാനോ ടെക്നോളജിയുടെ വികാസമാണ് ഫ്ളെക്‌സിബിള്‍ ഇലക്ട്രോണികസിന്‍റെ അടിസ്ഥാനമായി വര്‍ത്തിക്കുന്നത്. കാര്‍ബണ്‍ നാനോട്യൂബുകള്‍ നാനോ ടെക്‌നോളജിയുടെ സംഭാവനയാണ്. കാര്‍ബണ്‍ നാനോ ട്യൂബുകള്‍ ഇപ്പോള്‍ ഫ്ളെക്‌സിബിള്‍ ഇലക്ട്രോണിക്‌സില്‍ ഉപയോഗിക്കാന്‍ ആരംഭിച്ചിട്ടുണ്ട്. ഇതിന്‍റെ ഗൂണമെന്തെന്നാല്‍ ഒരു സര്‍ക്യൂട്ടായി പ്രവര്‍ത്തിക്കുന്നതിനൊപ്പം ഉപകരണങ്ങളുടെ ഭാരം കുറയ്ക്കാനും 15 മടങ്ങ് വരെ അവയെ വലിച്ച് നീട്ടാനും സാധിക്കും.  സാധാണയായി എല്‍സിഡി നിര്‍മ്മാണത്തില്‍ ഗ്ളാസാണ് അടിസ്ഥാനമായി ഉപയോഗിക്കുന്നത്. എന്നാല്‍ ഇതിന് പകരമായി ഒരു പോളിമര്‍ ഫിലിം ഉപയോഗിച്ചാല്‍ ആ സംവിധാനമാകെ ഫ്ളെക്‌സിബിളാകും. ഒന്നിന് മീതേ മറ്റൊന്നായി പല അടരുകളായി ഫ്ളെക്‌സ് സര്‍ക്യൂട്ടുകള്‍ നിര്‍മ്മിക്കാനാകും.

ഫ്ളെക്‌സിബിള്‍ ഇലക്ട്രോണിക്‌സ് രംഗത്തെ പ്രധാന കണ്ടുപിടുത്തമാണ് ഓര്‍ഗാനിക് ലൈറ്റ് എമിറ്റിങ്ങ് ഡയോഡുകള്‍ (OLED ). ഇതും ഒരുതരം ലൈറ്റ് എമിറ്റിങ് ഡയോഡുകള്‍ അഥവാ എല്‍ഇഡിയാണ്. സാധാരണ എല്‍ഇഡികളായി പ്രവര്‍ത്തിക്കുന്നത് ചില അര്‍ധചാലകങ്ങളാണ്. അവയില്‍നിന്ന് വ്യത്യസ്തമായി വൈദ്യുതി പ്രവഹിക്കുമ്പോള്‍ പ്രകാശം പുറത്ത് വിടുന്ന ഓര്‍ഗാനിക് പദാര്‍ഥങ്ങളാണ് ഒര്‍ഗാനിക് ലൈറ്റ് എമിങ്ങ് ഡയോഡുകള്‍. സാധാരണ എല്‍ഇഡികളേക്കാള്‍ കനംകുറഞ്ഞതും ഫ്ളെക്‌സിബിളുമാണ്. ഫ്ളെക്‌സിബിള്‍ സോളാര്‍ പാനലുകള്‍ ഇതേ പാതയുടെ പിറവിയാണ്.

പ്രിന്‍റഡ് ഇലക്ട്രോണിക്സ്

ഫ്ലെക്സിബിൾ ഇലക്ട്രോണിക്സിന് ബഹുമുഖ ഭാവങ്ങൾ നല്‍കിയ സാങ്കേതിക വിദ്യയാണ് പ്രിന്‍റഡ് ഇലക്ട്രോണിക്സ്.  ഇലക്ട്രോണിക്സ് സർക്യൂട്ടുകളെ ലോല പ്രതലങ്ങളില്‍ അച്ചടിച്ചെടുക്കുന്ന വിദ്യ. കടലാസ് പോലെ ചുരുട്ടുവാനും നിവർത്തുവാനും ഒക്കെ സാധിക്കുന്ന ഫ്ലെക്സിബിൾ ഇലക്ട്രോണിക്സ് ഉപാധികൾ തയ്യാറാക്കുന്നത് മിക്കപ്പോഴും പ്രിന്‍റഡ് ഇലക്ട്രോണിക്സ് എന്ന ആശയത്തിന്‍റെ പിന്‍ബലത്തോടെയാണ്. ഇലക്ട്രോണിക് സർക്യൂട്ട് ബോർഡുകളും വിഷ്വല്‍ ഡിസ്പ്ലേ സ്ക്രീനുകളും മറ്റും പ്രിന്‍റഡ് ഇലക്ട്രോണിക്സിന്‍റെ ലോകത്തില്‍ ഇപ്പോൾ സർവ്വ സാധാരണമാണ്.  ഇ ബുക്ക് റീഡറുകൾ, ഗ്ലൂക്കോസ് ടെസ്റ്റ് സ്ട്രിപ്പുകൾ, സോളാർ സെല്ലുകൾ എന്നിങ്ങനെ നീളുന്ന പലും ഇപ്പോൾ പ്രിന്‍റഡ് ഇലക്ട്രോണിക്സിലൂടെ ഇപ്പോൾ തന്നെ ചെയ്യുന്നുണ്ട്.

ഓർഗാനിക് ഇലക്ട്രോണിക്സ്

ഇന്‍സുലേറ്ററുകൾക്ക് ഉദാഹരണമായി പ്ലാസ്റ്റിക്കിനെ ചൂണ്ടിക്കാണിച്ചിരുന്നതൊക്കെ പഴങ്കഥയാവുകയാണിപ്പോൾ.  ഇപ്പോഴതിനെ നല്ലയൊരു കണ്ടക്ടർ ആയിട്ടാണ് സാങ്കേതിക ലോകം കൈകാര്യം ചെയ്യുന്നത്. അതായത് പ്ലാസ്റ്റിക് എന്ന ഇന്‍സുലേറ്റർ പ്ലാസ്റ്റിക് എന്ന കണ്ടക്ടർ ആയി രൂപം മാറി വൈദ്യുത പ്രവാഹത്തിന് സുഗമമായൊരു പാതയൊരുക്കുകയാണിവിടെ. ഫ്ലെക്സിബിൾ ഇലക്ട്രോണിക്സിന്‍റെ ഒരു ഉപ വിഭാഗമായി അനന്ത സാധ്യതകളുടെ ലോകമാണ് ഇനി വരുവാനിരിക്കുന്നത്.  കണ്ടക്ടിങ്ങ് പോളിമറുകളെ കൈകാര്യ ചെയ്യുന്ന മേഖലയാണ് പ്ലാസ്റ്റിക് ഇലകട്രോണിക്സ് അഥവാ ഓർഗാനിക് ഇലക്ട്രോണിക്സ്.  പോളിമറിലെ തന്മാത്രകൾ കാർബണ്‍ ബേസഡ് ആയതിനാലാണ് ഇതിനെ ഓർഗാനിക് ഇലക്ട്രോണിക്സ് എന്ന് പറയുന്നത്.  കോപ്പർ, സിലിക്കണ്‍ തുടങ്ങിയ ഇന്‍ ഓർഗാനിക് കണ്ടക്ടറുകളുമായി തട്ടിച്ച് നോക്കുമ്പോൾ താഴ്ന്ന വിലയും ഉയർന്ന വഴക്കവും, ഭാരക്കുറവും ഒക്കെ കണ്ടക്ടിങ്ങ് പോളിമറുകളുടെ സവിശേഷതകളാണെന്ന് കാണാം.

ഫ്ലെക്സിബിൾ ഇലക്ട്രോണിക്സ് – ഭാവിയിലെ മാറ്റങ്ങൾ

വ്യത്യസ്തങ്ങളായ വ്യവസായങ്ങളില്‍ നിർണ്ണായകമായ മാറ്റങ്ങൾക്ക് വഴി മരുന്നിടുവാന്‍ പര്യാപ്തമായൊരു സാങ്കേതിക വിദ്യയാണ് ഫ്ലെക്സിബിൾ ഇലക്ട്രോണിക്സ് എന്നത്.  കമ്പ്യൂട്ടർ കീ ബോർഡുകൾക്കുള്ളിലെ കിമട്രിക്സ്, വാഹനങ്ങൾക്കുള്ളിലെ ഇന്‍സ്ട്രുമെന്‍റ് പാനല്‍, സ്മാർട്ട് ഫോണുകൾക്കൊപ്പമുള്ള  സോളിഡ് സ്റ്റേറ്റ് ഡിസ്പ്ലേ എന്നിവയെല്ലാം ഫ്ലെക്സിബിൾ ഇലക്ട്രോണിക്സ് ടെക്നോളജിയുടെ ഉദാഹരണമാണ്. ബഹിരാകാശ വാഹനങ്ങളില്‍ പതിപ്പിക്കുന്ന ഫ്ലെക്സിബിൾ സോളാർ പാനല്‍ ആണ് മറ്റൊരുദാഹരണം.  

വൈദ്യ ശാസ്ത്രവും ഫ്ലെക്സിബിൾ ഇലക്ട്രോണിക്സും

മെഡിക്കല്‍ ഇലക്ട്രോണിക്സ് ഒരു സാങ്കേതിക പഠന ശാഖയായി വികാസം പ്രാപിച്ചിരിക്കുന്ന ഇക്കാലത്ത് ഫ്ലെക്സിബിൾ ഇലക്ട്രോണിക്സിന് ഈ രംഗത്ത് ഏറെ മാറ്റങ്ങൾ വരുത്തുവാന്‍ കഴിയും. X Ray മെഷിനുകളില്‍ നിലവിലുള്ള ട്യൂബിന് പകരമായി ഓർഗാനിക് തിന്‍ ഫിലിം ട്രാന്‍സിസ്റ്റർ (OTFT) ഉപയോഗിക്കുന്നത് വഴി ചിലവ് മാത്രമല്ല ഭാരവും കുറക്കുവാന്‍ കഴിയും.  മെഡിക്കല്‍ ലാബിലുള്ള ഗ്ലാസ് നിർമ്മിതമായ പല ഉപകരണങ്ങൾക്കും പകരംമായി OTFT ഉപയോഗിക്കുവാന്‍ കഴിയും.   ഭാവിയില്‍ നമ്മള്‍ മൊബൈല്‍ഫോണ്‍ പോലുള്ള ഇലക്ട്രോണിക്സ് ഉപകരണങ്ങള്‍ കൊണ്ട് നടക്കേണ്ടി വരില്ലത്രേ. ശാസ്ത്രജ്ഞര്‍ ഇതൊക്കെയും നമ്മുടെ ശരീരത്തില്‍ ഇംപ്ലാന്‍റ് ചെയ്യുവാനുള്ള ശ്രമത്തിലാണ്. വെയറബിള്‍ ഇലക്ട്രോണിക്സിന്‍റെ കാലമാണിനി. വളരെ നേര്‍ത്തതും ഫ്ലെക്സിബിളുമായ ഒരു ഓര്‍ഗാനിക് ലൈറ്റ് എമിറ്റിങ്ങ് ഡയോഡ് (O-LED) യൂണിവേഴ്സിറ്റി ഓഫ് ടോക്യോയിലെ ഗവേഷകര്‍ കണ്ട് പിടിച്ചിരിക്കുന്നു. ഇത് ഇലക്ട്രോണിക്സ് സ്കിന്നിന്‍റെ കണ്ടു പിടുത്തത്തിലേക്ക് ആണ് വഴി മരുന്നിടുന്നത്. വൈദ്യശാസ്ത്രരംഗത്ത് വന്‍ മാറ്റങ്ങള്‍ക്ക് വഴി തെളിക്കുന്നയൊന്നാണിത്. ത്വക്കിനുള്ളില്‍ പതിപ്പിക്കുക വഴി നേര്‍സ്പര്‍ശമില്ലാതെ രക്തത്തിലെ ഗ്ലൂക്കോസ് നില അറിയുവാന്‍ ഈ സ്കിന്‍ വഴി സാധിക്കും. ഒരു ഇന്‍ജക്ഷനിലൂടെ ശരീരത്തിലുള്‍ക്കൊള്ളിക്കുവാന്‍ കഴിയുന്ന ഈ നാനോ മെംബ്രയിന്‍ പ്രവര്‍ത്തിക്കുന്നത് കൈത്തണ്ടയിലിടാവുന്ന സ്മാര്‍ട് ബ്രേസ് ലെറ്റ് നല്‍കുന്ന വൈദ്യുതി ഉപയോഗിച്ചാണ്. ശയ്യാവലംബിയായ നിത്യ രോഗികളില്‍ പതിവായ ബെഡ്സോർ എന്ന പ്രശ്നം അതിന്‍റെ തുടക്കത്തില്‍ത്തന്നെ മുന്നറിയിപ്പായി ഉയർത്തിക്കാട്ടുന്ന സ്മാർട്ട് ബാന്‍ഡേജ് ആണ് ബെഡ്സോർ അലേർട്ട് ബാന്‍ഡേജ്.  ടാറ്റു പോലെ താല്‍ക്കാലികമായി തൊലിപ്പുറത്ത് പതിപ്പിക്കാവുന്ന, ബ്ലഡ് ഗ്ലൂക്കോസ് നില അളന്നറിയിക്കുന്ന പ്രത്യേക ഇ – ടാറ്റു ആണ് ഗ്ലൂക്കോസ് ടെസ്റ്റ് ടാറ്റു എന്ന പ്രിന്‍റഡ് ഇലക്ട്രോണിക്സ് ടാറ്റു.

പെന്‍സില്‍വാനിയ യൂണിവേഴ്സിറ്റിയില്‍ 2011 – ല്‍ തന്നെ ബ്രെയിന്‍ മാപ്പിങ്ങ് എളുപ്പമാക്കുന്ന ഫ്ലെക്സിബിൾവ ഇ ഇ ജി ഇലക്ട്രോഡ് (Flexible EEG Electrode) പരീക്ഷിക്കപ്പെട്ടിട്ടുണ്ട്.  പതിവ് പോലെ ഇലക്ട്രോഡുകൾ കുത്തിയിറക്കാതെ സെറിബ്രല്‍ കോർട്ടക്സ് സർഫസില്‍ നിന്നുള്ള ന്യൂറല്‍ ആക്ടിവിറ്റികൾ റെക്കോർഡ് ചെയ്യുവാന്‍ സഹായിക്കുന്ന ഈ പുതിയ വിദ്യ (High Density Array For Mapping Activities) ഈ സാങ്കേതിക വിദ്യക്ക് മകുടോദാഹരണമാണ്. 

ഫ്ലെക്സിബിൾ ഇലക്ട്രോണിക്സ് വാഹന വ്യവസായത്തില്‍

കണ്ക്ടിവിറ്റി ഉള്ള വാഹനങ്ങളാവും ഭാവിയിലെ ട്രെന്‍ഡ്.  വാഹനങ്ങളുടെ ഡിസ്പ്ലേ ആണ് ഇനി ഫ്ലെക്സിബിൾ ആകുവാന്‍ പോകുന്നത്.   ഓർഗാനിക് LCD (OLCD) ഡിസ്പ്ലേകളാണ് ഇനി വാഹനങ്ങളിലുണ്ടാവുക.   വളരെ നേർത്തതും ഭാരക്കുറവുള്ളതുമായ ഇതിന് താരതമേന്യ ചിലവും കുറവായിരിക്കും.

പ്രതിരോധ മേഖലയിലും ഫ്ലെക്സിബിൾ ഇലക്ടോണിക്സിന്‍റെ സാന്നിധ്യം

ഫ്ളെക്‌സിബിള്‍ ഇലക്ട്രോണിക്‌സ് അതിന്‍റെ ചിറക് വിരിച്ച് പറക്കാന്‍ പോകുന്നത് പ്രതിരോധമേഖലയിലാണ്. യുദ്ധമേഖലയിലോ, പ്രത്യേക സൈനിക നടപടിയിലോ ഏര്‍പ്പെട്ടിരിക്കുന്ന സൈനികരുടെ ഒരോ നീക്കവും  അറിയാന്‍ അവരുടെ ശരീരത്തില്‍ സ്ഥാപിക്കുന്ന ഫ്‌ളെക്‌സിബിള്‍ ഇലക്ട്രോണിക്‌സ് ഉപകരണങ്ങള്‍ കൊണ്ട് സാധിക്കും. മാത്രമല്ല അവരുടെ ശാരീരിക അവസ്ഥയെങ്ങനെ എന്നറിഞ്ഞ് ആവശ്യമായ വൈദ്യസഹായം ലഭ്യമാക്കാനും ഇത് സഹായിക്കും. ഭാരമൊട്ടും ഇല്ലാത്തതിനാല്‍ ഇത്തരം ഉപകരണങ്ങള്‍ സൈനികര്‍ക്ക് പ്രയാസങ്ങളുണ്ടാക്കുകയുമില്ല

യുദ്ധ മുന്നണിയിലെ സൈനീകരുടെ ശരീര താപനിലയും ഹൃദയ താളവും രക്തസമ്മർദ്ദവും ഒക്കെ സമയ ബന്ധിതമായി നിരീക്ഷിക്കുവാനും, കണ്ടെത്തലുകൾ അതി വേഗത്തില്‍ വയർ രഹിത പാതകളിലൂടെ മറ്റൊരിടത്തേക്ക് അതിവേഗത്തില്‍ എത്തിച്ച് കൊടുക്കുവാനും കഴിവുള്ള സ്മാർട്ട് ബാന്‍ഡേജുകൾ പ്രധാനമായും പ്രതിരോധ മേഖലയില്‍ പ്രചാരത്തിലായിക്കഴിഞ്ഞു.  ആയുധങ്ങളില്‍ത്തന്നെ പതിപ്പിക്കുന്ന ഡിജിറ്റല്‍ ഡിസ്പ്ലേ സ്ക്രീനുകളും ഡിജിറ്റല്‍ ഡിസ്പ്ളേകളുടെ വസ്ത്ര രൂപങ്ങളും മറ്റും ഇതിലുൾപ്പെടുന്നതാണ്. ഫ്ലെക്സിബിൾ ലേബർ മാർക്കുകൾ, ലേസർ ഗണ്ണുകൾ എന്നിങ്ങനെ നീളുന്ന യുദ്ധോപകരണങ്ങൾ ആണ് മറ്റൊരു ഫ്ലെക്സിബിൾ കാഴ്ച..

പരസ്യ ബോർഡുകളും ഫ്ലെക്സിബിൾ

മാറുന്ന ഡിസ്പ്ലേ ആണ് വർത്തമാന ലോകത്തെ കാഴ്ച.  ഗ്ലാസുകളില്‍ നിർമ്മിക്കുന്ന വലിയ പരസ്യബോർഡുകളുടെ സ്ഥാനം ഫ്ലെക്സിബിൾ ഡിസ്പ്ളേകൾ ഏറ്റെടുക്കും.  ഗ്ലാസുകളിലുള്ള ഡിസ്പ്ളേകൾ അവയുടെ കൂടിയ ഭാരം കൊണ്ടും പൊട്ടുവാന്‍ സാധ്യതയുള്ളതു കൊണ്ടും അനാകർഷകമാണ്.  ഒഎല്‍ഇഡികളാണ് (OLED) ഫ്ളെക്‌സിബിള്‍ ഇലക്ട്രോണിക് ഉപകരണങ്ങളുടെ ഡിസ്പ്ളേയായി പ്രവര്‍ത്തിക്കുന്നത്..   LCD ഡിസ്പ്ലേകൾക്കുള്ല എല്ലാ ഗുണങ്ങളോടൊപ്പം ഭാരക്കുറവും നേർത്തതും ഏത് പ്രതലത്തിലും ഉപയോഗിക്കാമെന്നതും ഇത്തരം ഡിസ്പ്ളേകളുടെ സ്വീകര്യത വർദ്ധിപ്പിക്കുന്നു.

ഓർഗാനിക്  ബാറ്ററി

അച്ചടിച്ചടുക്കുന്ന ബാറ്ററിയാണ് ഓർഗാനിക് ബാറ്ററി എന്ന പ്രിന്‍റഡ് ബാറ്ററി.  ഫ്ലെക്സിബിൾ ഇലക്ട്രോണിക്സിന് ആവശ്യമായ പ്രത്യേക സെമി കണ്ടക്ടറുകൾ നിർമ്മിക്കുവാന്‍ മാത്രമല്ല ഫ്ലെക്സിബിൾ ആയ ബാറ്ററികൾ നിർമ്മിക്കുവാനും ഓർഗാനിക് പോളിമറുകൾ ഉപയോഗപ്പെടുത്തുവാന്‍ കഴിയും. കടലാസിന്‍റെ കട്ടി മാത്രമുള്ള നേരിട്ട് അച്ചടിച്ചെടുക്കാവുന്ന ഓർഗാനിക് ബാറ്ററിയില്‍ പുതിയ തരം റാഡിക്കല്‍ പോളിമർ ഇലക്ട്രോഡുകൾ ആണുപയോഗിക്കുന്നത്.  കടലാസിന്‍റെ കട്ടി മാത്രമുള്ള നേരിട്ട് അച്ചടിച്ചെടുക്കാവുന്ന ഓർഗാനിക് ബാറ്ററിയില്‍ പുതിയ തരം റാഡിക്കല്‍ പോളിമർ  ആണുപയോഗിക്കുന്നത്.  ഇങ്ക്ജെറ്റ് പ്രിന്‍റിങ്ങ് വഴി അച്ചടിച്ചെടുക്കുന്ന  ഇത്തരം ഓർഗാനിക് ബാറ്ററികൾ ചുരുട്ടുവാനും നിവർത്തുവാനും കഴിയുന്ന റി ചാർജ്ജബിൾ  ബാറ്ററികളാണ്.

കളിക്കോപ്പുകളില്‍ ഫ്ലെക്സിബിൾ ഇലകട്രോണിക്സ്

കളിപ്പാട്ടങ്ങളിലുള്ള ഫ്ലെക്സിബിൾ ഇലക്ട്രോണിക്സിന്‍റെ സാന്നിധ്യം അതിനെ കൂടുതല്‍ ആകർഷകമാക്കുന്നു.  ഇപ്പോൾ പ്രചാരത്തിലുള്ള ഫ്ലെക്സിടോയ് ഉല്‍പ്പന്നങ്ങളായ പല കളിപ്പാട്ടങ്ങളായ കുട്ടികൾക്ക് കളിക്കുവാന്‍ മാത്രമല്ല, റിമോട്ട് കണ്‍ട്രോൾ പോലെ മറ്റ് ഇലക്ട്രോണിക് ഉപകരണങ്ങളെ ചെയ്യുവാന്‍ കൂടി സഹായിക്കത്തക്ക വിധത്തില്‍ ഫ്ലെക്സിബിൾ ഡിസ്പ്ലേ യൂണിറ്റ് ഉൾപ്പെടുത്തിയാണ് വിപണിയിലെത്തിക്കുന്നത്. ചുരുക്കത്തില്‍ കുട്ടികൾക്ക് പ്രിയങ്കരമായേക്കാവുന്ന ഫ്ലെക്സിബിളും ഇന്‍ററാക്ടീവും ആയ പ്രിന്‍റഡ് ഇലക്ട്രോണിക്സ് കളിപ്പാട്ടങ്ങളുടെ കാലമാണ് മുന്‍പിലെത്തി നില്‍ക്കുന്നു എന്നർത്ഥം.

സ്മാർട്ട് ഡിവൈസുകളും ഫ്ലെക്സിബിൾ ആകുമ്പോൾ

പ്രതിരോധവും വൈദ്യ ശാസ്ത്രവുമൊക്കെ വിട്ട് ഈ സാങ്കേതിക വിദ്യ സാധാരണക്കാരുടെ ഇടയിലേക്ക് ഇറങ്ങുകയാണ്.  ടെലിവിഷനുകളിലേക്കും സ്മാർട്ട് ഫോണുകളിലേക്കുമൊക്കെ ഈ സാങ്കേതിക വിദ്യ സന്നിവേശിക്കുമ്പോൾ കാര്യങ്ങൾ കൂടുതല്‍ എളുപ്പമാകുന്നു. ക്യാനഡയിലെ ക്യൂന്‍സ് യൂണിവേഴ്സിറ്റിയിലേയും  അരിസോണ യൂണിവേഴ്സിറ്റിയിലേയും ഗവേഷകർ ഒരുമിച്ച് ചേർന്ന് ചുരുട്ടുവാനും മടക്കുവാനും സാധിക്കുന്ന പേപ്പർ ഫോണ്‍ രൂപപ്പെടുത്തിയിരിക്കുന്നു.  കാഴ്ചയില്‍ പ്ലാസ്റ്റിക് ആവരണമുള്ള കടലാസ് ഷീറ്റ് പോലെ ഇരിക്കുന്ന ഇതിന്‍റെ പ്രോട്ടോ ടൈപ്പ് ആണ് ഇപ്പോൾ ഗവേഷകർ വികസിപ്പിച്ചിരിക്കുന്നത്.  

ലോകത്തിലെ ആദ്യത്തെ ഫ്ലെക്സിബിൾ OLED ഡിസ്പ്ലേ സ്മാർട്ട് ഫോണ്‍ ആയ ഗ്യാലക്സി റൌണ്ട് സാംസങ്ങാണ് പുറത്തിറക്കിയത്.  തൊട്ടു പിന്നാലെ എല്‍ ജി ഫ്ലെക്സ് എന്ന ആദ്യ റിയല്‍ കേർവ്ഡ് സ്മാർട്ട് ഫോണ്‍ അവതരിപ്പിച്ചു.

പോക്കറ്റില്‍ കൊണ്ട് നടക്കുവാന്‍ സാധിക്കുന്നയത്ര വലിപ്പത്തില്‍ രൂപപ്പെടുത്തിയിരിക്കുന്ന ആദ്യത്തെ ഇ റീഡറാണ് റേഡിയസ്. ചുരുട്ടുവാന്‍ സാധിക്കുന്ന ഇ – പേപ്പർ ഡിസ്പ്ലേയാണ് ഇതിനുള്ളത്.  പോളിമർ വിഷന്‍ എന്ന കമ്പനി നിർമ്മിച്ചിരിക്കുന്ന  ഈ ഡിവൈസ് വായന കഴിഞ്ഞാല്‍ ചുരുട്ടി പോക്കറ്റിലിടാവുന്നതാണ്.

കളർ ടെലിവിഷനുകളില്‍ മുതല്‍ കമ്പ്യൂട്ടറിലും സ്മാർട്ട് ഫോണുകളിലും വരെ ഇപ്പോൾ ഓർഗാനിക് ലൈറ്റ് എമിറ്റിങ്ങ് ഡയോഡുകളും (OLED) ഡിസ്പ്ലേകളും കടന്ന് കൂടിക്കഴിഞ്ഞു.

സംഗീതം ഇഷ്ടപ്പെടുന്നവർക്ക് സഹചാരിയായ കൂടെ കൊണ്ട് നടക്കാവുന്ന ഒരു ഹാന്‍ഡി ഇലക്ട്രോണിക് കീ ബോർഡാണ് റോൾ അപ് ഇലക്ട്രോണിക് പിയാനോ.

ഉപയോഗ ശേഷം ചുരുട്ടിയെടുക്കാന്‍ കഴിയുന്ന ഇത് ലൂജെക്സ് എന്ന കമ്പനിയാണ് രൂപകല്‍പ്പന ചെയ്തിരിക്കുന്നത്. ശരീരത്തില്‍ ധരിക്കാവുന്ന വെയറബിളുകൾ ഇപ്പോഴെ തരംഗം ആയിക്കഴിഞ്ഞു.  മാത്രമല്ല, ഇനി നമ്മള്‍ ധരിക്കാന്‍ പോകുന്ന വസ്ത്രങ്ങള്‍ പോലും ഫ്ളെക്‌സിബിള്‍ സാങ്കേതിക വിദ്യ സന്നിവേശിപ്പിച്ചതായിരിക്കും.

ഫ്ലെക്സിബിൾ ഇലക്ട്രോണിക്സിന്‍റെ ഭാവി

കാര്യക്ഷമത,  കൂടുതല്‍ കാലം നിലനില്‍ക്കുന്നത്, കുറഞ്ഞ ഊര്‍ജ ഉപഭോഗം എന്നിവ ഫ് ളെക്‌സിബിള്‍ ഇലക്ട്രോണിക്‌സിന്‍റെ സവിശേഷതകളാണ്.  പരമ്പാരാഗത സാങ്കേതിക വിദ്യയേക്കാൾ ചെലവ് കുറഞ്ഞ നിർമ്മാണ രീതിയും അതിനാല്‍ത്തന്നെ താരതമേന്യ താഴ്ന്ന വിലയും ഉപയോഗിക്കുവാന്‍ കൂടുതല്‍ എളുപ്പവുമായതും ഇതിനെ വിപണിക്ക് പ്രിയങ്കരമാക്കുന്നു.  2020 ല്‍ സോണി സമ്മാനിക്കുമെന്ന് കരുതുന്ന ബ്രേസ് ലെറ്റ് കമ്പ്യൂട്ടറിനായി കാത്തിരിക്കുകയാണ് സാങ്കേതിക ലോകം ഇപ്പോൾ.  ഫ്ളെക്‌സിബിള്‍ ഇലക്ട്രോണിക്‌സ് ഉപകരണങ്ങളെ വിപണിയില്‍ എത്തിക്കുന്നതില്‍ നിന്ന് ഇത്രയും കാലം തടഞ്ഞിരുന്നത് ഊര്‍ജ സംഭരണ സംവിധാനങ്ങളുടെ അപര്യാപ്തതയായിരുന്നു.  എന്നാല്‍ ഫ്ളെക്‌സിബിള്‍ സോളാര്‍ പാനലുകളുടെ വരവോടെ പ്രതിസന്ധി ഏറെക്കുറെ ഒഴിവാകുമെന്ന് പറയാം.  ഫ്ലെക്സിബിൾ ഇലക്ട്രോണിക്സ് ടെക്നോളജിക്കൊപ്പം പ്രവർത്തിക്കുന്ന അനുബന്ധ സാങ്കേതിക വിദ്യകളായ ഓർഗാനിക് ഇലക്ട്രോണിക്സും പ്രിന്‍റഡ്/പ്ലാസ്റ്റിക് ഇലക്ട്രോണിക്സും നാനോ സയന്‍സും ത്രിഡി പ്രിന്‍റിങ്ങും ഒക്കെ നിത്യേന കൈവരിക്കുന്ന പുരോഗതിയും നാളെകളില്‍ ഫ്ലെക്സിബിൾ ഇലക്ട്രോണിക്സ് ടെക്നോളജിയെ ജനപ്രിയമാക്കിയേക്കാം.  

ഹൈഡ്രജന്‍ - വരും കാലത്തിലെ ഇന്ധനം

ലോകം അഭിമുഖീകരിക്കുന്ന ഏറ്റവും വലിയ ഒരു പ്രശ്നമായിട്ടാണ് ഇന്ധന ക്ഷാമം  വിലയിരുത്തപ്പെടുന്നത്. ഊർജ്ജം ശേഖരിച്ച് വെക്കുവാന്‍ കഴിവുള്ളതും പിന്നീട് ആ ഊർജ്ജം ആവശ്യാനുസരണം ഉപയോഗിക്കുവാന്‍ കഴിവുള്ള വസ്തുക്കളാണ് ഇന്ധനങ്ങൾ എന്നത്. പെട്രോളിയം ഉല്‍പ്പന്നങ്ങളുടെ ഭാവിയിലെ ക്ഷാമത്തെ മുന്‍പില്‍ കണ്ടും ഒപ്പം പരിസ്ഥിതി സൌഹാർദ്ദവുമായിതിനാലാണ് വാഹനങ്ങൾ ബാറ്ററിയിലേക്ക് മാറ്റുവാന്‍ പ്രമുഖ കമ്പനികൾ തയ്യാറെടുക്കുന്നത്.  ലോകത്തെ മുന്‍ നിര കമ്പനികളെല്ലാം തന്നെ തങ്ങളുടെ ഇലക്ട്രിക് വാഹനങ്ങൾ പ്രഖ്യാപിച്ച് കഴിഞ്ഞു. പുത്തന്‍ ഊർജ്ജ സ്രോതസിലേക്കുള്ള മനുഷ്യന്‍റെ അന്വേഷണമാണ് സോളാർ, വിന്‍ഡ്, ടൈഡല്‍ തുടങ്ങിയ ഊർജ്ജ സ്രോതസുകളിലേക്ക് അവനെ എത്തിച്ചത്. എന്നാല്‍ ശാസ്ത്ര സാങ്കേതിക ലോകം അതിനുമപ്പുറത്തേക്കാണ് ചിന്തിക്കുന്നത്. അനതി വിദൂര ഭാവിയിലെ ഇന്ധനം ഹൈഡ്രജന്‍ ആയിരിക്കുമെന്നാണ് ശാസ്ത്ര സാങ്കേതിക മേഖലയിലെ വിദഗ്ദർ വിലയിരുത്തുന്നത്.

പ്രകൃതിയിലെ ഇന്ധന ശേഖരത്തിന് എന്ത് സംഭവിക്കും

നാം ഇന്നുപയോഗിക്കുന്ന കല്‍ക്കരി, പെട്രോളിയം, പ്രകൃതി വാതകങ്ങൾ (Natural Gases), ഫോസില്‍ ഇന്ധനങ്ങൾ (Fossil Fuels) എന്നിവയൊക്കെ വർഷങ്ങൾ കൊണ്ടാണ് പ്രകൃതി ഉല്‍പ്പാദിപ്പിച്ച് സമാഹരിച്ച് സൂക്ഷിച്ച് വച്ചിട്ടുള്ളത്. പത്തൊന്‍പതാം നൂറ്റാണ്ട് വരെ പ്രകൃതിയുടെ ഈ ഇന്ധന ശേഖരത്തിന് കാര്യമായ കുറവ് ഉണ്ടായിരുന്നില്ല, എന്നാല്‍ പിന്നീടുള്ള വ്യവസായ മുന്നേറ്റങ്ങൾ മൂലം പ്രകൃതിയുടെ ഇന്ധന ശേഖരം ഗണ്യമായി കുറഞ്ഞ് കൊണ്ടിരിക്കുന്നു. ഇപ്പോൾ ഉപയോഗിച്ച് കൊണ്ടിരിക്കുന്ന നിരക്കില്‍ മാത്രം ഉപയോഗിച്ചാലും കല്‍ക്കരി നിക്ഷേപം ഇനി ഒരു ഒരു നൂറ് വർഷത്തേക്ക് മാത്രമേ തികയുകയുള്ളു. കല്‍ക്കരി നിക്ഷേപം ലോകത്തിലാകെ നോക്കിയാല്‍ ഏകദേശം 860938 മില്യണ്‍ ടണ്‍ എന്നാണ് കണക്കുകൾ ചൂണ്ടിക്കാണിക്കുന്നത്.  പ്രതിവർഷ ഉപയോഗം 8000 മില്യണ്‍ ടണ്‍ ആണത്രെ. അതായത് നൂറ് കൊല്ലം കഴിഞ്ഞാല്‍ കല്‍ക്കരിയെല്ലാം മനുഷ്യന്‍ ഉപയോഗിച്ച് തീർക്കുമത്രെ.

ഇനി പെട്രോളിയത്തിന്‍ കാര്യമെടുത്താല്‍ ലോകത്താകെ 1481526 മില്യണ്‍ ബാരല്‍ എണ്ണ നിക്ഷേപമുണ്ട് എന്നാണ് കണക്കാക്കിയിട്ടുള്ളത്. പ്രതി ദിനം ഏകദേശം 87 മില്യണ്‍ ബാരല്‍ ലോകമാകെ ഇപ്പോൾ ഉപയോഗിക്കുന്നുണ്ട്. ഈ തോതില്‍ ഉപയോഗം തുടർന്നാല്‍ 47 വർഷം കൊണ്ട് പ്രകൃതിയുടെ ഈ പെട്രോളിയം ശേഖരം തീർന്ന് പോകുമത്രെ. അതായത് ഏകദേശ കണക്ക് പറഞ്ഞാല്‍ അടുത്ത 50 കൊല്ലം കൊണ്ട് പെട്രോളിയവും 100 കൊല്ലം കൊണ്ട് കല്‍ക്കരിയും മനുഷ്യന്‍ ഉപയോഗിച്ച് തീർക്കുമത്രെ.  ഇവിടെയാണ് മറ്റ് ഇന്ധനങ്ങളുടെ ആവശ്യകതയും പ്രസക്തിയും.

എന്ത് കൊണ്ട് ഹൈഡ്രജന്‍

ഹൈഡ്രജന്‍ ഒരു ഇന്ധനമായി ഉപയോഗിക്കപ്പെടുവാന്‍ നിരവധി കാരണങ്ങളുണ്ട്.  ഹൈഡ്രജന്‍ എന്നത് ഒരു എനർജി ക്യാരിയർ ആണ്. അതായത് ഊർജ്ജത്തെ ഒരു സ്ഥലത്ത് നിന്നും മറ്റൊരു സ്ഥലത്തേക്ക് സുഗമമായി കൊണ്ടു പോകുവാന്‍ കഴിയുന്നയൊന്ന്. ഏറ്റവും വലിയ പ്രത്യേകത ഹൈഡ്രജന്‍ കത്തിച്ചാല്‍ കിട്ടുന്നത് ജലം ആയിരിക്കും എന്നതാണ്. അതിനാല്‍ തന്നെ വാഹനങ്ങളില്‍ ഇതൊരു ഇന്ധനമായി ഉപയോഗിച്ചാല്‍ പുകക്കുഴലില്‍ കൂടി പുറന്തള്ളപ്പെടുന്നത് നീരാവി മാത്രമായിരിക്കുമെന്നതിനാല്‍ വാഹനങ്ങളില്‍ കൂടിയുള്ള അന്തരീക്ഷ മലിനീകരണം ഇല്ലാതെയായി മാറുമെന്ന് പ്രതീക്ഷിക്കപ്പെടുന്നു. ഹൈഡ്രജന്‍ സംയുക്താവസ്ഥയില്‍ പ്രകൃതിയില്‍ സുലഭവുമാണ്.  ജല തന്‍മാത്രയില്‍ നിന്നും ഹൈഡ്രജന്‍ വേർതിരിക്കാവുന്നതാണ്. ഒരു ഗ്രീന്‍ എനർജി എന്നതാണ് ഹൈഡ്രജനുള്ള പ്രത്യേകത.

മാത്രവുമല്ല ജലത്തില്‍ നിന്നും വൈദ്യുത വിശ്ളേഷണം വഴി ലഭിക്കുന്ന ഹൈഡ്രജനും ഓക്സിജനും ഉപയോഗിച്ച് Fuel Cells നിർമ്മിച്ച് അവയില്‍ നിന്നും വൈദ്യുതി ഉണ്ടാക്കാവുന്നതാണ്.

എങ്ങനെ ഹൈഡ്രജന്‍ ലഭിക്കും

ഹൈഡ്രജന്‍ എന്നത് വളരെ ചെറിയ മൂലകമാണ്. എന്നിരുന്നാല്‍ തന്നേയും അത് ഒരു ഗ്യാസ് ആയി നേരിട്ട് ലഭിക്കുന്ന ഒന്നല്ല. മൂലകാവസ്ഥയില്‍ അത് വളരെ കുറച്ചേ ഉള്ളു. അതിനാല്‍ തന്നെ അത് മറ്റ് സംയുക്തങ്ങളില്‍ നിന്നും വേർതിരിക്കണ്ടേതുണ്ട്. ഇലക്ട്രോളൈസിസും സ്റ്റീം റീഫോമിങ്ങുമാണ് സാധാരണയായി ഉപയോഗിക്കുന്ന മാർഗ്ഗങ്ങൾ.  സ്റ്റീം റീഫോമിങ്ങില്‍ മീഥേനില്‍ നിന്നുമാണ് ഹൈഡ്രജന്‍ വേർതിരിക്കുന്നത്. എന്നാല്‍ ഈ പ്രക്രിയയില്‍ ഉണ്ടാകുന്ന ഗ്രീന്‍ ഹൌസ് ഗ്യാസുകൾ ഗ്ലോബല്‍ വാമിങ്ങിന് കാരണമാവുകയും ചെയ്യും.  മറ്റൊരു മാർഗ്ഗമായ ഇലക്ട്രോളൈസിസില്‍ വെള്ളത്തിലൂടെ കറന്‍് കടത്തി വിടുകയാണ് ചെയ്യുന്നത്. അപ്പോൾ വെള്ളമെന്നത് അതിന്‍റെ ഘടകങ്ങളായ ഹൈഡ്രജന്‍, ഓക്സിജന്‍ എന്നിവയായി വേർ പിരിയും. എന്നാല്‍ ഇത് വളരെ ചിലവേറിയ ഒന്നാണ്.

Israel Institute of Technology യിലെ ഗവേഷകർ ഒരു bio-photo-electro-chemical (BPEC) സെല്‍ രൂപപ്പെടുത്തുന്നതില്‍ വിജയിച്ചിട്ടുണ്ട്.  സൂര്യപ്രകാശം ഉപയോഗിച്ച് വെള്ളത്തില്‍ നിന്നും ഹൈഡ്രജന്‍ വേർതിരിക്കുന്നതാണിവിടെ സംഭവിക്കുന്നത്.

കൃത്രിമ ഇല – ഹൈഡ്രജന്‍ വേർതിരിക്കുവാന്‍

പച്ച വെള്ളത്തില്‍ നിന്നും ഹൈഡ്രജന്‍ വേർ തിരിക്കുവാന്‍ വളരെ ലളിതമായ ഒരു സാങ്കേതിക വിദ്യയുമായി വന്നിരിക്കുകയാണ് അമേരിക്കയിലെ പ്രശസ്തമായ മസാച്ചു സെറ്റ്സ് ഇന്‍സ്റ്റിറ്റ്യൂട്ട് ഓഫ് ടെക്നോളജിയിലെ (MIT) ശാസ്ത്രജ്ഞനായ ഡാന്‍ നൊസേറ. കണ്ടാല്‍ സാധാരണ ഒരു ഇല പോലെ ഇരിക്കുന്ന ഇത് സിലിക്കണ്‍ സോളാർ സെല്ലുകൾ കൊണ്ട് നിർമ്മിക്കപ്പെട്ടിരിക്കുന്ന ഒന്നാണ്. ഇത് വെറുതെ വെള്ളത്തിലിട്ടാല്‍ മതിയാകും വെള്ളം വിഘടിച്ച് ഹൈഡ്രജനും ഓക്സിജനും ആയി മാറുന്നു. തീരെ ഭാരക്കുറവുള്ള ഈ ഇല സൂര്യ പ്രകാശത്തിന്‍റെ സാന്നിധ്യത്തില്‍ ഒരു ഗ്ലാസ് ജലത്തിലിട്ടാല്‍ കുമിളകളായി      ഒരു വശത്ത് ഓക്സിജനും മറു വശത്ത് ഹൈഡ്രജനും വന്നു കൊണ്ടിരിക്കും. ‘സണ്‍ കാറ്റലിറ്റിക്സ്’ എന്ന കമ്പനി ഈ ഇല വ്യാവസായിക അടിസ്ഥാനത്തില്‍ നിർമ്മിക്കുവാന്‍ ഉദ്ദേശിക്കുന്നുണ്ട്.

ഹൈഡ്രജന്‍ ഉപയോഗങ്ങൾ

നാസ തങ്ങളുടെ പ്രധാന ഇന്ധനമായി ഇപ്പോൾത്തന്നെ ഹൈഡ്രജന്‍ ഉപയോഗിക്കുന്നുണ്ട്. ദ്രാവകാവസ്ഥയിലുള്ള ഹൈഡ്രജന്‍ സ്പേസ് ഷട്ടിലിലും റോക്കറ്റിലുമൊക്കെ ഉപയോഗിക്കുന്നുണ്ട്. കാരണം ഒരു കിലോഗ്രാം ഏവിയേഷന്‍ ഫ്യൂവലില്‍ നിന്നും ലഭിക്കുന്ന ഊർജ്ജത്തിന്‍റെ മൂന്നിരട്ടി ഒരു കിലോഗ്രാം ഹൈഡ്രജനില്‍ നിന്നും ലഭിക്കും. ചില വളങ്ങളുണ്ടാക്കുവാനും പ്ലാസ്റ്റിക്കുകളുടേയും ചില മരുന്നുകളുടേയും നിർമ്മാണത്തിനുമൊക്കെ ഇത് ഉപയോഗിക്കുന്നുണ്ട്. വാഹനങ്ങളില്‍ ഇന്ധനം ആയി ഉപയോഗിക്കുവാന്‍ കഴിയും എന്നതാണ് ഇതിന്‍റെ ഏറ്റവും വലിയ ഗുണം.

ഹൈഡ്രജന്‍ ഫ്യൂവല്‍ സെല്ലുകൾ

ഹൈഡ്രജനിലുള്ള കെമിക്കല്‍ എനർജിയെ ഇലക്ട്രിസിറ്റി ആക്കി മാറ്റുന്നത് ഹൈഡ്രജന്‍ ഫ്യൂവല്‍ സെല്ലുകൾ ആണ്. ജലവും, താപവും ആണ് ഈ പ്രക്രിയയിലെ ഉപോല്‍പ്പന്നങ്ങൾ. ഇത് മലീനീകരണം ഉണ്ടാക്കുന്നില്ല എന്ന് മാത്രമല്ല മറ്റ് സാധാരണ സെല്ലുകളെ ആപേക്ഷിച്ച് നോക്കുമ്പോൾ രണ്ടോ മൂന്നോ മടങ്ങ് കാര്യക്ഷമതയും നല്‍കുന്ന ഒന്നാണ്. ഈ ഫ്യൂവല്‍ സെല്ലുകൾ ബസ്, കാർ പോലുള്ള വാഹനങ്ങള്‍, മറൈന്‍ വാഹനങ്ങൾ തുടങ്ങിയവയിലൊക്കെ ഉപയോഗിക്കുന്ന ബാറ്ററികളില്‍ ഉപയോഗിക്കുവാന്‍ കഴിയും.

                       

ഭാവിയിലെ വാഹനങ്ങൾ പെട്രോളിനും ഡീസലിനും പകരം ഹൈഡ്രജന്‍ ഉപയോഗിക്കുന്നവയായിരിക്കും എന്നാണ് പ്രതീക്ഷിക്കപ്പെടുന്നത്. അങ്ങനെയെങ്കില്‍ ഇന്നത്തെ പെട്രോൾ പമ്പുകൾക്ക് പകരം ഹൈഡ്രജന്‍ പമ്പുകളായിരിക്കും വഴിയോരങ്ങളില്‍ കാണപ്പെടുക.

ചില പ്രശ്നങ്ങൾ

എന്നിരുന്നാലും ചില സാങ്കേതിക പ്രശ്നങ്ങൾ ഈ മേഖലയിലുണ്ട് എന്നത് അവഗണിക്കാവുന്നതല്ല.

1.       ജലത്തില്‍ നിന്നും വൈദ്യത വിശ്ലേഷണം (Electrolysis) വഴി ഹൈഡ്രജന്‍ ഉല്‍പ്പാദിപ്പിക്കുവാന്‍ വേണ്ടി വരുന്ന ഊർജ്ജത്തേക്കാൾ കുറവ് ഊർജ്ജം മാത്രമേ ഹൈഡ്രജന്‍ ഒരു ഇന്ധനമായി ഉപയോഗിക്കുമ്പോൾ നമുക്ക് ലഭിക്കുകയുള്ളു. അതായത് ഊർജ്ജ ബാലന്‍സ് ഷീറ്റ് (Energy Balance Sheet) നെഗറ്റീവ് ആയിരിക്കും.

2.       വളരെ കനം കുറഞ്ഞ മൂലകമാണ് ഹൈഡ്രജന്‍ എന്നതിനാല്‍ കാറുകളേക്കാൾ പല മടങ്ങ് വലിപ്പമുള്ള ഇന്ധന ടാങ്ക് വേണ്ടി വരും.

3.       ഹൈഡ്രജന്‍ വാതകത്തെ ദ്രാവക രൂപത്തില്‍ ആക്കുന്നതിനായി വളരെ കുറഞ്ഞ താപനിലയും (Temperature) ഉയർന്ന മർദ്ദവും (Pressure) വേണ്ടി വരും. എന്നാല്‍ ചില പ്രത്യേക ലോഹ മിശ്രിതങ്ങൾ (Alloys) ഉപയോഗിച്ച് അധി ശോഷണം നടത്തി ഈ പ്രശ്നങ്ങൾ പരിഹരിക്കുവാന്‍ സാങ്കേതിക വിദഗ്ദർ ശ്രമിച്ച് കൊണ്ടിരിക്കുന്നു.

ഈ പ്രതിസന്ധികളെ എല്ലാം മറി കടന്ന് വന്‍ ഓട്ടോ മൊബൈല്‍ കമ്പനികൾ പലതും ഹൈഡ്രജന്‍ കാറുകൾ ഇപ്പോൾ തന്നെ നിർമ്മിച്ച് കഴിഞ്ഞിട്ടുണ്ട്. തെക്കന്‍ കൊറിയന്‍ കമ്പനിയായ Hyundai തങ്ങളുടെ ix 35 മോഡല്‍ കാർ വിജയകരമായി നിർമ്മിച്ച് കഴിഞ്ഞു. ഫ്യൂവല്‍ സെല്‍ ടെക്നോളജിയാണ് ഈ കമ്പനി വികസിപ്പിച്ചെടുത്തത്.  ജപ്പാന്‍ കമ്പനികളായ ടെയോട്ടയും ഹോണ്ടയും ഹൈഡ്രജന്‍ കാറുകൾ വിഫണിയിലെത്തിക്കാനുള്ള ശ്രമത്തിലാണ്.

ഇത്തരം വാഹനങ്ങൾ വ്യാപകമാകുന്ന സ്ഥിതി വിശേഷം ഉണ്ടായാല്‍ അത് പെട്രോളിയം ഇറക്ക് മതി ചെയ്യുന്ന രാജ്യമായ നമ്മുടെ സാമ്പത്തിക മേഖലയില്‍ സൃഷ്ടിക്കുന്ന  പ്രത്യാഖ്യാതങ്ങൾ അനവധിയായിരിക്കും. പെട്രോൾ, ഡീസല്‍ വാഹനങ്ങളുടെ അനുബന്ധ വ്യവസായ മേഖലയിലും ഇതുണ്ടാക്കുന്ന മാറ്റങ്ങൾ അനവധിയായിരിക്കും. പുത്തന്‍ സ്റ്റാർട്ടപ്പുകൾ ഈ മേഖലയില്‍ ഉടലെടുക്കും.  കോടിക്കണക്കിന് രൂപ പെട്രോളിയം മേഖലയില്‍ നിക്ഷേപിച്ചിരിക്കുന്ന വന്‍ കമ്പനികളെ ഇത് എങ്ങനെ ബാധിക്കുമെന്നതൊക്കെ കണ്ടറിയേണ്ടതാണ്.  ഏതായാലും ഭാവിയിലെ ഇന്ധനം ഹൈഡ്രജന്‍ ആകുമെന്നതിന്‍റെ സൂചനകൾ നല്‍കി ലോകമാകെ നിരവധി ശാസ്ത്രജ്ഞർ ഈ രംഗത്ത് ഗവേഷണം നടത്തുന്നുണ്ട്.

റിവേഴ്സ് എഞ്ചിനിയറിങ്ങ് – ഒരു അവലോകനം

വ്യാവസായിക രംഗത്താണ് നാം സാങ്കേതിക വിദ്യയുടെ കൂടുതല്‍ ഗുണ ഭോക്താക്കളായി മാറുന്നത്. ഏത് ഉല്‍പ്പന്നത്തിന്‍റെ കാര്യത്തില്‍ ആണെങ്കിലും അതിന്‍റെ രൂപകല്‍പ്പന മുതല്‍ പാക്കിങ്ങ് വരെ നീളുന്നതാണ് വിവിധ എഞ്ചിനിയറിങ്ങ് മേഖലകൾ. ഉല്‍പ്പാദനവുമായി ബന്ധപ്പെട്ട് എഞ്ചിനിയറിങ്ങിനെ ഫോർവേഡ് എഞ്ചിനിയറിങ്ങ് എന്നും റിവേഴ്സ് എഞ്ചിനിയറിങ്ങ് എന്നും രണ്ടായി തിരിക്കുവാന്‍ കഴിയും.  

നാം സാധാരണയായി കാണുന്ന ഒട്ടു മിക്കവാറും ഉല്‍പ്പാദനവും ഫോർവേഡ് എഞ്ചിനിയറിങ്ങിന്‍റെ കാറ്റഗറിയില്‍ വരുന്നതാണ്.  ഒരു നിശ്ചിത സ്പെസിഫിക്കേഷനിലുള്ള ഒരു ഉല്‍പ്പന്നം സാങ്കേതിക വിദ്യയുടെ സഹായത്തോടെ ഉണ്ടാക്കുന്നതാണ് ഇത്.

എന്നാല്‍ റിവേഴ്സ് എഞ്ചിനിയറിങ്ങ് എന്നത് ഇതില്‍ നിന്നും വ്യത്യസ്തമാണ്.  നിലവിലുള്ള ഒരു ഉല്‍പ്പന്നത്തേയോ അതിന്‍റെ പ്രത്യേകതകളേയോ പഠിച്ചിട്ട് അത് റി ഡിസെന്‍ ചെയ്യുകയാണിവിടെ.

അതായത് നിലവിലുള്ള ഉല്‍പ്പന്നത്തെ പഠിച്ചിട്ട് പുനർ നിർമ്മിക്കുകയാണിവിടെ എന്ന് പറയാം. ഫോർവേഡ് എഞ്ചിനിയറിങ്ങില്‍ ആവശ്യങ്ങളനുസരിച്ച് ഒരു ഉല്‍പ്പന്നം നിർമ്മിക്കുമ്പോൾ നിലവിലുള്ള സംവിധാനത്തില്‍ നിന്ന് തന്നെയുള്ള വിവരങ്ങളാണ് റിവേഴ്സ്  എഞ്ചിനിയിറങ്ങില്‍ ഉപയോഗിക്കുന്നത്. മനുഷ്യ പ്രയത്നവും ബുദ്ധിയും കൂടുതലായി വേണ്ടി വരുന്നത് ഫോർവേഡ് എഞ്ചിനിയിറിങ്ങിലാണ്.

എവിടെയാണ് റിവേഴ്സ് എഞ്ചിനിയറിങ്ങിന്‍റെ ആവശ്യകത

വ്യാവസായിക രംഗത്ത് റിവേഴ്സ് എഞ്ചിനിയറിങ്ങ് പലപ്പോഴും ആവശ്യമായി വരാറുണ്ട്.  വളരെ പഴയാതായ ഒരു മെഷ്യനോ കാറ് പോലുള്ളവയുടെയോ ചില ഭാഗങ്ങൾ കേടായി എന്നും കരുതുക. പക്ഷേ കമ്പനി അവയുടെ ഉല്‍പ്പാദനം നിർത്തിയിരിക്കുന്ന സാഹചര്യമാണെന്നും ചിന്തിക്കുക.  എന്നാല്‍ കേടായ ചില ഭാഗങ്ങൾ മാറ്റിയാല്‍ അത് പ്രവർത്തനക്ഷമമാകുമെങ്കില്‍ ഇവിടെ സഹായത്തിനെത്തുക റിവേഴ്സ് എഞ്ചിനിയറിങ്ങ് ആണ്. കാരണം യഥാർത്ഥ ഭാഗങ്ങൾ കിട്ടാതെ വരികയോ അത് വളരെ ചിലവേറിയതാവുകയോ ചെയ്യുമ്പോഴാണ് ഇങ്ങനെ ചെയ്യേണ്ടി വരുന്നത്.

ഏതെങ്കിലും മെഷ്യന്‍റെ ചില പ്രത്യേക ഭാഗങ്ങൾ മാത്രം മെച്ചപ്പെടുത്തേണ്ടി വരുമ്പോൾ അല്ലെങ്കില്‍ ഉൽപ്പന്നത്തിന്റെ ചില മോശമായ സവിശേഷതകൾ രൂപകൽപ്പന ചെയ്യേണ്ടി വരുമ്പോൾ റിവേഴ്സ് എഞ്ചിനിയറിങ്ങ് ആവശ്യമായി വരുന്നുണ്ട്.

റിവേഴ്സ് എൻജിനീയറിങ്ങില്‍ യഥാർത്ഥ ഉല്‍പ്പന്നത്തിന്‍റെ ഭാഗങ്ങളുടെ ഭൗതിക അളവുകൾ, സവിശേഷതകൾ, ഭൌതിക ഗുണങ്ങൾ എന്നിവ പിടിച്ചെടുത്ത് നിലവിലുള്ള ഭാഗത്തിന്റെ തനിപ്പകർപ്പ് ഉണ്ടാക്കുകയാണ് ചെയ്യുന്നത്.  ഒരു ഉല്പന്നത്തിന്റെ ദീർഘകാല ഉപയോഗത്തെ അടിസ്ഥാനമാക്കിയുള്ള ഒരു ഉൽപ്പന്നത്തിന്റെ നല്ല സവിശേഷതകൾ ശക്തിപ്പെടുത്തുന്നതിന് ഇത് ഉപകരിക്കുന്നു. എതിരാളികളുടെ ഉൽപ്പന്നത്തിന്റെ നല്ലതും മോശവുമായ സവിശേഷതകൾ വിശകലനം ചെയ്യുവാനും ഇത് പ്രയോജനപ്പെടുത്തുന്നു.

റിവേഴ്സ് എഞ്ചിനിയറിങ്ങ് എങ്ങനെ സാധ്യമാവുന്നു

മെക്കാനിക്കല്‍, ഇലക്ട്രോണിക്സ്, കെമിക്കല്‍, കമ്പ്യൂട്ടർ, ബയോളജി തുടങ്ങി സാങ്കേതിക വിദ്യയുടെ എല്ലാ മേഖലകളിലും റിവേഴ്സ് എഞ്ചിനിയറിങ്ങ് ആവശ്യമായി വരുന്നുണ്ട്. വ്യത്യസ്ത മേഖലകളില്‍ വ്യത്യസ്തമായ രീതിയാണ് അവലംബിക്കുന്നത്.  എങ്കിലും പൊതുവായി റി ക്രിയേറ്റ് ചെയ്യേണ്ട ഉല്‍പ്പന്നത്തിന്‍റെ അളവുകൾ എടുക്കുകയാണ് ആദ്യമായി ചെയ്യുന്നത്. ഒരു മെക്കാനിക്കല്‍ ഉല്‍പ്പന്നമാണെങ്കില്‍ അത് 3D സ്കാനറുകൾ ഉപയോഗിച്ച് ചെയ്യാവുന്നതാണ്.  തുടർന്ന് computer-aided design (CAD) and computer-aided manufacturing (CAM) എന്നി സോഫ്റ്റ് വെയറുകളുപയോഗിച്ച് തുടർന്നുള്ള കാര്യങ്ങൾ ചെയ്യാവുന്നതാണ്.  ഇലക്ട്രോണിക്സ് ഉല്‍പ്പന്നമാണെങ്കില്‍ നിലവിലുള്ള പ്രിന്‍റഡ് സർക്യൂട്ട് ബോർഡ് (PCB) അനലൈസ് ചെയ്യുകയാണ് ആദ്യ പടി. ബോർഡിലുള്ള ഓരോ കമ്പോണന്‍റുകളുടേയും മൂല്യം തിട്ടപ്പെടുത്തുകയും തത്തുല്യമായത് ഉപയോഗിച്ച് പുതിയതായ ബോർഡുകൾ ഉണ്ടാക്കുകയും ചെയ്യുന്നു.

സോഫ്റ്റ് വെയർ മേഖലയാണ് റിവേഴ്സ് എഞ്ചിനിയറിങ്ങ് ഏറെ ഇടപെടലുകൾ നടത്തുന്ന ഒന്ന്. നിലവിലുള്ള പ്രോഗ്രാമിലെ ബൈനറി കോഡുകൾ മാറ്റം വരുത്തിക്കൊണ്ടാണിത് സാധ്യമാക്കുന്നത്. കൈമിക്കല്‍ , ബയോളജിക്കല്‍ മേഖലയിലും റിവേഴ്സ് എഞ്ചിനിയറിങ്ങ് ഉപയോഗപ്പെടുത്തുന്നുണ്ട്.

പല രാജ്യങ്ങളും ശത്രു രാജ്യങ്ങളുടെ പല ഉപകരണങ്ങളും കോപ്പി ചെയ്യുവാനായിട്ട് ഇത് ഉപയോഗിക്കുന്നുണ്ട്. ജർമന്‍ പ്രതിരോധ സേന ഉപയോഗിച്ചിരുന്ന ഒരു ക്യാനിന്‍റെ ഡിസൈന്‍ അമേരിക്കന്‍ സേന കോപ്പിയടിച്ചത് ഒരു ഉദാഹരണം മാത്രം.

റിവേഴ്സ് എഞ്ചിനിയറിങ്ങ് പ്രായോഗിക തലത്തില്‍

നിരവധി വ്യത്യസ്ത മേഖലകളില്‍ റിവേഴ്സ് എഞ്ചിനിയറിങ്ങ് ഉപയോഗപ്പെടുത്തുന്നുണ്ട്. വൈദ്യ ശാസ്ത്രത്തില്‍ അസ്ഥി രോഗ വിഭാഗത്തിലും ദന്ത വൈദ്യത്തിലുമെല്ലാം ഇതിന്‍റെ സാധ്യതകൾ ധാരാളമായി ഉപയോഗപ്പെടുത്താറുണ്ട്. ആനിമേഷന്‍ സിനിമയില്‍ ഇത് ധാരാളമായി പ്രയോജനപ്പെടുത്താറുണ്ട്. വ്യത്യസ്തമായ കെമിക്കലുകളുടെ കോമ്പോസിഷന്‍ കണ്ട് പിടിക്കുവാനും അതുപയോഗിച്ച് പുതിയവ രൂപകല്‍പ്പന ചെയ്യുവാനും ഇത് ഉപയോഗപ്പെടുത്തുന്നുണ്ട്.

റിവേഴ്സ് എഞ്ചിനിയറിങ്ങ് - നേട്ടങ്ങൾ

പുതിയ ഉല്‍പ്പന്നങ്ങൾ താരതമേന്യ കുറഞ്ഞ ചിലവില്‍ ഉല്‍പ്പാദിപ്പിക്കുവാന്‍ സാധിക്കുന്നു.

ഉല്‍പ്പന്നങ്ങൾക്ക് കുറഞ്ഞതായ മെയിന്‍റനന്‍സ് ചാർജ്ജ്

നിലവിലുള്ള ഉല്‍പ്പന്നങ്ങളുടെ ഗുണനിലവാരം ഉയർത്തുവാന്‍ സാധിക്കുന്നു

റിവേഴ്സ് എഞ്ചിനിയറിങ്ങ് – ചില നിയമ പ്രശ്നങ്ങൾ

പലപ്പോഴും റിവേഴ്സ് എഞ്ചിനിയറിങ്ങ് ചില നിയമ പ്രശ്നങ്ങളിലേക്ക് നീണ്ട് പോകാറുണ്ട്. ഒരു ഉല്‍പ്പന്നം കോപ്പി അടിക്കപ്പെടുന്നത് ഇന്‍റലക്ട്വല്‍ പ്രോപ്പർട്ടി റൈറ്റ്സിന്‍റെ പരിധിയില്‍ വരുമെന്നതിനാല്‍ തന്നെ ഒരു പക്ഷേ ഇത് നിയമ യുദ്ധത്തിലേക്ക് നയിച്ചേക്കാം. 

എന്നിരുന്നാല്‍ തന്നേയും പല കമ്പനികളും വ്യപകമായി ഉപയോഗപ്പെടുത്തുന്ന ഒന്നാണ് റിവേഴ്സ് എഞ്ചിനിയറിങ്ങ് എന്നത്.

മെഷിന്‍ ലേണിങ്ങ് – മാറുന്ന ബിസിനസ് ലോകം

ആർട്ടിഫിഷ്യല്‍ ഇന്‍റലിജെന്‍സ് എന്നത് ഒരിക്കല്‍ ഈ പംക്തിക്ക് വിഷയീഭവിച്ചതാണ്.  എന്നാല്‍ അതിലെ പുതു വസന്തമാണ് മെഷിന്‍ ലേണിങ്ങ് എന്നത്.  ആർട്ടിഫിഷ്യല്‍ ഇന്‍റലിജെന്‍സ് എന്നതിനെപ്പറ്റി മനുഷ്യന്‍ ചിന്തിക്കുവാന്‍ തുടങ്ങിയിട്ട് ആറ് പതിറ്റാണ്ടുകൾ കഴിഞ്ഞ് പോയിരിക്കുന്നു. ആ കൃത്രിമ ബുദ്ധിയുടെ പുതു വസന്തമാണ് മെഷിന്‍ ലേണിങ്ങ് എന്നത്.  ആർട്ടിഫിഷ്യല്‍ ഇന്‍റലിജെന്‍സിന്‍റെ ഉപമേഖലയാണ് മെഷിന്‍ ലേണിങ്ങ് എന്നത്.

എന്താണ് മെഷിന്‍ ലേണിങ്ങ്

യന്ത്രങ്ങളെ കാര്യങ്ങൾ പഠിപ്പിച്ചെടുക്കുകയാണ് ഇവിടെ ചെയ്യുന്നത്.  ഒരു പ്രത്യേക കാര്യം ചെയ്യുന്നതിനായി യന്ത്രങ്ങളെ ആയത് പഠിപ്പിച്ച് കൊടുക്കുന്നതാണിതെന്ന് ലളിതമായി പറയാം. മെഷിന്‍ ലേണിങ്ങില്‍ വിവിധ തരം സംവിധാനങ്ങളുണ്ടെങ്കിലും ഇപ്പോൾ അതിന്‍റെ ആകർഷണം നൂതന ആർട്ടിഫിഷ്യല്‍ റൂറല്‍ നെറ്റ്  വർക്കുകൾ തന്നെയാണ്. ഒരു മനുഷ്യന്‍റെ തലച്ചോറിന് സമാനമായ രീതിയില്‍ കംപ്യൂട്ടറുകളുടെ പ്രവര്‍ത്തനം നിര്‍മ്മിച്ചെടുക്കുന്നതാണ് ന്യൂറല്‍ നെറ്റ് വര്‍ക്കില്‍ സാധ്യമാവുന്നത്.  അനേകായിരം ചിത്രങ്ങളില്‍ നിന്ന് ഒരാളുടെ ചിത്രം തിരിച്ചറിയാന്‍ സാധിക്കുന്ന കംപ്യൂട്ടര്‍ സംവിധാനം ഇതിന്‍റെ ഏറ്റവും പ്രധാന ഉദാഹരണമാണ്. മുഖം തിരിച്ചറിയുന്നതിനോടൊപ്പം മുഖ ഭാവം തിരിച്ചറിയുന്നതും മെഷിന്‍ ലേണിങ്ങിന്‍റെ ഉദാഹരണമാണ്. അതായത് നമ്മൾ സന്തോഷത്തിലാണോ, ദുഖത്തിലാണോ, മനസ്സിനുള്ളില്‍ പ്രതിഷേധത്തിലാണോ എന്നുള്ളതൊക്കെ തിരിച്ചറിയുവാന്‍ കഴിയുന്ന മെഷിന്‍ ലേണിങ്ങ് ആപ്ലിക്കേനുകൾ വിജയകരമായി രംഗത്തുണ്ട്.  .  ഫേസ് ബുക്കും ഗൂഗിളുമെല്ലാം നാം ഇടുന്ന ഫോട്ടോയില്‍ നിന്നും നമ്മളെ തിരിച്ചറിഞ്ഞ് ടാഗ് ചെയ്യുന്നത് ഇതിലൂടെ ആണ്. അതായത് ഒരു പ്രശ്നത്തെ പരിഹരിക്കുന്നതിന് പ്രത്യേകം അല്‍ഗോരിതം ഉണ്ടാക്കുന്നതിന് പകരം മനുഷ്യന്‍ പ്രശ്നം പരിഹരിക്കുന്ന ഡേറ്റയില്‍ നിന്ന് കമ്പ്യൂട്ടർ സംവിധാനം പഠിച്ചെടുക്കുന്ന രീതിയാണ് മെഷിന്‍ ലേണിങ്ങ്.

മെഷിന്‍ ലേണിങ്ങ് പ്രവർത്തന മേഖല

കമ്പ്യൂട്ടറിന് കിട്ടുന്ന ഡേറ്റയില്‍ നിന്നാണ് അത് വിവരങ്ങൾ ശേഖരിച്ച് ഔട്ട് പുട്ട് നല്‍കുന്നത്. അത് സഞ്ചിതമായ ഒരു വിവര ശേഖരം ആണ്. ഇത് സ്ഥിതി വിവര കണക്കുകൾ ആവാം, ലേഖനങ്ങൾ ആവാം, ചിത്രങ്ങൾ ആവാം, ശബ്ദഫയലുകൾ ആവാം, വീഡിയോ ആവാം.  ഇതിനെ മെഷിന്‍ ലേണിങ്ങിന്‍റേതായ പ്രത്യേക പ്രോഗ്രാമുകൾ ഉപയോഗിച്ച് പ്രോസസ് ചെയ്യുന്നു. ഇതിന്‍റെ അടിസ്ഥാനത്തില്‍ തീരുമാനങ്ങൾ എടുക്കുവാനും നമുക്ക് നിർദ്ദേശങ്ങൾ നല്‍കുവാനും മെഷീനുകൾക്ക് സാധിക്കും. ഉദാഹരണമായി രണ്ട് ഭാഷകളില്‍ നിന്നുള്ള ഡേറ്റാ നല്‍കുക ആണെങ്കില്‍ വിവർത്തനം നടത്തുവാന്‍ പോലും മെഷിന്‍ സ്വയം പഠിക്കുന്നു. ഇങ്ങനെ നിരന്തരമായി നിരീക്ഷിക്കപ്പെടുവാന്‍ കഴിയുന്നതോ ഒരുപാട് ഡേറ്റ നമുക്ക് കൈവശം ഉള്ളതോ ആയ എന്ത് കാര്യത്തിനും മെഷിന്‍ ലേണിങ്ങ് ഉപയോഗിക്കാം.

മെഷിന്‍ ലേണിങ്ങ് – പ്രായോഗിക മേഖല

ഇന്ന് പല കമ്പനികളും മെഷിന്‍ ലേണിങ്ങ് ഉപയോഗിക്കുന്നുണ്ട്. വിവിധ മേഖലകളിലുട നീളം തട്ടിപ്പിന് സാധ്യതയുള്ള കാര്യങ്ങൾ കണ്ടെത്തുവാന്‍ ഇത് ഉപയോഗപ്പെടുത്തുന്നുണ്ട്. പേപാല്‍ കമ്പനി ദശലക്ഷക്കണക്കിന് ഇടപാടുകൾ കൈകാര്യം ചെയ്യുന്നതിനായി മെഷിന്‍ ലേണിങ്ങ് ഉപയോഗിക്കുന്നു. കള്ളപ്പണം വെളുപ്പിക്കുന്നതിനെതിരെ ഗവണ്‍മെന്‍റുകളും ഇത് പ്രയോജനപ്പെടുത്തുന്നുണ്ട്.

നമ്മൾക്ക് ഗൂഗിളില്‍ കുറേ തിരയിലിന് ശേഷവും ഉദ്ദേശിച്ച റിസൾട്ട് കിട്ടിയില്ല എങ്കില്‍ പിന്നീടുള്ള സെർച്ചില്‍ ബന്ധപ്പെട്ട റിസൾട്ടുകൾ ഗൂഗിൾ റെക്കമന്‍റെ ചെയ്യുന്നത് മെഷിന്‍ ലേണിങ്ങ് അൾഗോരിതങ്ങൾ മൂലമാണ്.

സ്റ്റോക്ക് മാർക്കറ്റുകൾ എന്ത് ചെയ്യുമെന്ന് പ്രവചിക്കുവാന്‍ മനുഷ്യനേക്കാളേറെ മെഷിന്‍ ലേണിങ്ങ് അൾഗോരിതങ്ങൾക്ക് കഴിയുന്നുണ്ട്. പല പ്രശസ്ത വ്യാപാര സ്ഥാപനങ്ങളും ഉയർന്ന വേഗത്തിലും ഉയർന്ന അളവിലും ട്രേഡുകൾ പ്രവചിക്കുവാനും നടപ്പിലാക്കുവാനും മെഷിന്‍ ലേണിങ്ങ് ഉപയോഗിക്കുന്നുണ്ടിപ്പോൾ.

ഡ്രൈവറില്ലാ സ്മാർട്ട് കാറുകളായിരിക്കും നാളെ നിരത്തുകളിലെന്നത് ഏറെക്കുറെ പ്രവചിക്കപ്പെട്ടയൊന്നാണ്. ഒരു സ്മാർട്ട് കാർ ഇന്‍റർനെറ്റ് ഓഫ് തിങ്സുമായി സംയോജിപ്പിക്കുക മാത്രമല്ല, അതിന്‍റെ ഉടമയെക്കുറിച്ചും പരിസ്ഥിതിയെക്കുറിച്ചും അറിയുകയും ഡ്രൈവിങ്ങ് സാഹചര്യങ്ങൾ റിപ്പോർട്ട് ചെയ്യുകയും പ്രശ്നങ്ങൾ സ്വയം പരിഹരിക്കുകയും ചെയ്യും. സ്വയം  ഡ്രൈവ് ചെയ്യുകയും ട്രാഫിക്കിനെക്കുറിച്ചും രോഡ് അവസ്ഥകളെക്കുറിച്ചും തല്‍സമയ ഉപദേശം നല്‍കുകയും ചെയ്യുന്ന കാര്യങ്ങൾ ഇന്‍റർനെറ്റ് ഓഫ് തിങ്ങ്സും മെഷിന്‍ ലേണിങ്ങും ഉപയോഗപ്പെടുത്തിക്കൊണ്ട് ചെയ്യുവാന്‍ സാധിക്കും.

ആളുകളുടെ രോഗ വിവരങ്ങൾ അറിയുകയാണെങ്കില്‍ രോഗ സാഹചര്യങ്ങൾ മുന്‍കൂട്ടി പ്രവചിക്കുവാന്‍ കഴിയുന്നതാണ്. ഇതും സാധിക്കുന്നത് മെഷിന്‍ ലേണിങ്ങ് വഴിയാണ്.  

വിമാനത്താവളങ്ങൾ, സ്റ്റേഡിയങ്ങൾ, മറ്റ് പ്രോഗ്രാമുകൾ നടക്കുന്ന വേദികൾ എന്നിവിടങ്ങളിലെ സുരക്ഷാ സ്ക്രീനിങ്ങുകളില്‍ തെറ്റായ അലാറങ്ങൾ ഇല്ലാതാക്കുവാനും മനുഷ്യർക്ക് നഷ്ടമായ വിവരങ്ങൾ കണ്ടെത്തുവാനും മെഷിന്‍ ലേണിങ്ങിന് സാധിക്കും. അത്  സുരക്ഷിതമായ ഈവന്‍റുകൾ ഉറപ്പാക്കുവാനും സഹായിക്കുന്നു.

വിവിധങ്ങളായ മാല്‍വെയറുകളെ കൃത്യതയോടെ പ്രവചിക്കുവാനും മെഷിന്‍ ലേണിങ്ങ് അല്‍ഗോരിതങ്ങൾക്ക് സാധിക്കും. ക്ലൌഡിലെ ഡേറ്റാ പാറ്റേണുകൾ തിരയുവാനും സുരക്ഷാ പ്രശ്നങ്ങൾ പ്രവചിക്കുവാനും അപാകതകൾ റിപ്പോർട്ട് ചെയ്യുവാനും മെഷിന്‍ ലേണിങ്ങ് ഉപയോഗപ്പെടുത്താറുണ്ട്.

മെഷിന്‍ ലേണിങ്ങ് ബിസിനസ്സ് ലോകത്തില്‍

ബിസിനസ്സില്‍ വലിയ മാറ്റങ്ങൾ വരുത്തുവാന്‍ പര്യാപ്തമായ ഒരു സാങ്കേതിക വിദ്യയാണ് മെഷിന്‍ ലേണിങ്ങ് എന്നത്.  

ഉപഭോക്താവിന്‍റെ ഫീഡ് ബാക്കുകൾ കൃത്യമായി വ്യാഖ്യാനിക്കുവാന്‍ ഇത് വഴി സാധിക്കുന്നതാണ്. മുന്‍കാല ഉല്‍പ്പന്ന ഉപഭോക്താക്കളുമായി ബന്ധപ്പെട്ട ഉപഭോക്തൃ ഡേറ്റാ വിശകലനം ചെയ്യുവാനും അവ വ്യാഖ്യാനിക്കുവാനും ഇത് വഴി കഴിയും. അതിനാല്‍ അവർക്ക് കൃത്യമായ പ്രവചനങ്ങൾ നടത്തുവാനും അത് വഴി ബിസിനസ്സ് മെച്ചപ്പെടുത്തുവാനും സാധിക്കും.  അത് കൊണ്ട് തന്നെ ഉപഭോക്താവിനാവശ്യമായ വസ്തുക്കൾ തിരിച്ചറിഞ്ഞ് ഏറ്റവും അനുയോജ്യമായ ഏഫറുകൾ ഒപ്റ്റിമൈസ് ചെയ്യുകയും ചെയ്യും.  അതിന്‍ഫലമായി ഉപഭോക്താക്കൾക്കാവശ്യമായ രീതിയില്‍ പരസ്യങ്ങൾ ആസൂത്രണം ചെയ്യുവാന്‍ കഴിയുന്നതാണ്. ഇത് മൂലം ഊഹക്കച്ചവടങ്ങളും ഫലപ്രദമല്ലാത്ത ക്യാപയിനുകളും ഒഴിവാക്കുവാനും സാധിക്കുന്നതാണ്.

ഉപഭോക്താക്കളുടെ പെരുമാറ്റ രീതികളുടെ അടിസ്ഥാനത്തില്‍ വില്‍പ്പന, വിപണന തന്ത്രങ്ങൾ നിരന്തരം അവലോകനം ചെയ്യുന്നതിനും പരിഷ്കരിക്കുന്നതിനും മെഷിന്‍ ലേണിങ്ങ് ഉപയോഗപ്പെടുത്തുവാന്‍ കഴിയും. അതിലൂടെ പ്രോഡക്ടിന് ആവശ്യമായ മാറ്റങ്ങൾ വരുത്തുവാനും മെച്ചപ്പെട്ട വിപണി കണ്ടെത്തുവാനും കഴിയും.

ബിസിനസ് സംബന്ധമായ പല പ്രശ്നങ്ങൾക്കും മെഷിന്‍ ലേണിങ്ങ് ഒരു പോംവഴിയാണ്. നിലവിലുള്ള ഡേറ്റയില്‍ നിന്നും ആവർത്തനമായി പഠിക്കുവാനും പ്രോഗ്രാം ചെയ്യാതെ മറഞ്ഞിരിക്കുന്ന സ്ഥിതി വിവരക്കണക്കുകളെ കണ്ടെത്തുവാന്‍ കമ്പ്യൂട്ടറുകളെ സഹായിക്കുവാനും അല്‍ഗോരിതങ്ങളെ പ്രേരിപ്പിക്കുന്ന ഒരു ഡേറ്റാ വിശകലന പ്രക്രിയയാണ് മെഷിന്‍ ലേണിങ്ങ് എന്നത്.  ഗൂഗിൾ, ആമസോണ്‍, മൈക്രോസോഫ്റ്റ് തുടങ്ങിയവർ അവരുടെ ക്ലൌഡ് മെഷിന്‍ ലേണിങ്ങ് പ്ലാറ്റ്ഫോമുകൾ സാരംഭിച്ചതോടെ എം എല്‍ ന് സമീപ കാലത്ത് പ്രാധാന്യം ഏറി.  ഇ മെയിലുകളില്‍ സ്പാം കണ്ടെത്തല്‍, ഫെയ്സ്ബുക്ക് നടത്തിയ ഇമേജ് അല്ലെങ്കില്‍ ഫെയ്സ് ടാഗിങ്ങ് എന്നിവ ഉദാഹരണമാണ്. തിരഞ്ഞെടുത്ത പദങ്ങളോ, സ്പാം ഫില്‍ട്ടർ ചെയ്യുന്നതിനുള്ള പാറ്റേണോ ജി മെയില്‍ തിരിച്ചറിയുമ്പോൾ, ഇമേജ് റെക്കഗ്നിഷ്യന്‍ രീതി ഉപയോഗിച്ച് അപ് ലോഡ് ചെയ്ത ചിത്രങ്ങൾ ഫെയ്സ്ബുക്ക് സ്വയം ടാഗ് ചെയ്യുന്നു.

ഡേറ്റകൾ ഉപയോഗിച്ച് ബിസിനസ്സുകളില്‍ തീരുമാനങ്ങളെടുക്കേണ്ടി വരുന്ന സന്ദർഭങ്ങളില്‍ എം എല്‍ പ്രയോജനപ്പെടുത്തുവാന്‍ കഴിയും. പക്ഷപാതരഹിതമായ ബിസിനസ്സ് തീരുമാനങ്ങളെടുക്കുവാന്‍ കഴിയുമെന്നതാണ് ഇതിന്‍റെ പ്രത്യേകത. 

വിവിധ ജോലിക്കാരെ തിരഞ്ഞെടുക്കുവാന്‍ നമുക്ക് മെഷിന്‍ ലേണിങ്ങ് ഉപയോഗപ്പെടുത്തുവാന്‍ കഴിയും. ഒരു ഉദ്യോഗാർത്ഥിയെ സംബന്ധിക്കുന്ന വിദ്യാഭ്യാസ യോഗ്യ.തകൾ, പരിശീലനം,  പ്രവൃത്തി പരിചയം, വിജ്ഞാന മേഖലകൾ തുടങ്ങിയവയെല്ലാം കൃത്യമായി വിശകലനം ചെയ്ത് ഏറ്റവും നല്ല ആൾക്കാരെ തിരഞ്ഞെടുക്കുവാന്‍ കഴിയുന്നതിലൂടെ കമ്പനിക്ക് അവരുടെ സമയവും പണവുമെല്ലാം ലാഭിക്കുവാന്‍ കഴിയുന്നു.

മെഷിന്‍ ലേണിങ്ങ് ഭാവിയില്‍

ആർട്ടിഫിഷ്യല്‍ ഇന്‍റലിജെന്‍സും മെഷിന്‍ ലേണിങ്ങും പല വ്യവസായങ്ങളിലും സോഫ്റ്റ്വെയർ പാക്കേജുകൾക്കുള്ളിലും ഏതാനും ചില വർഷങ്ങൾക്കുള്ളില്‍ നമ്മുടെ ദൈനം ദിന ജീവിതത്തിന്‍റെ ഭാഗമായി ഉണ്ടായിരിക്കും. ഗൂഗിൾ പറയുന്നു മെഷിന്‍ ലേണിങ്ങ് ആണ് ഭാവി. മനുഷ്യന്‍ മെഷിനുകൾക്ക് അടിമകളാവുമ്പോൾ ലോകം ഏറ്റെടുക്കുന്ന ഒരു പുതിയ വിപ്ലവത്തിന് മെഷിനുകൾ നേതൃത്വം വഹിക്കും. ഡീപ് ലേണിങ്ങ് സങ്കേതങ്ങൾ മെഷിനുകൾക്ക് മനുഷ്യ ബുദ്ധി നല്‍കുന്ന കാലം വരും.  പ്രധാന ഇന്‍ഡസ്ട്രികളെല്ലാം മെഷിന്‍ ലേണിങ്ങ് കീഴടക്കുമെന്നാണ് സാങ്കേതിക ലോകത്തിലെ പ്രവചനം. ഇന്‍റർനെറ്റ് ഓഫ തിങ്സിന്‍റെ ആവിർഭാവവും മെഷിന്‍ ലേണിങ്ങിന് ഗുണകരമായി തീർന്നിട്ടുണ്ട്. സൈബർ സുരക്ഷയുടെ കാര്യങ്ങൾ കൂടി പരിഹരിക്കപ്പെട്ടാല്‍ മെഷിന്‍ ലേണിങ്ങ് വലിയ കുതിച്ച് ചാട്ടങ്ങൾക്ക് തുടക്കം കുറിക്കുമെന്ന് പ്രത്യാശിക്കാം.