സംരംഭകർക്ക് ഒരു കൈത്താങ്ങലായി വ്യവസായ വകുപ്പ് – എൻട്രപ്രണർഷിപ്പ് സപ്പോർട്ട് സ്കീം (ഇ എസ് എസ്)

ഉൽപ്പാദന മേഖലയിലുള്ള മൈക്രോ, സ്മോൾ സംരംഭങ്ങൾക്ക് കൈത്താങ്ങാകുന്നതിനു വേണ്ടി വിവിധ ഘട്ടങ്ങളിൽ സാമ്പത്തിക സഹായം അനുവദിക്കുവാൻ വ്യവസായ വകുപ്പ് ആവിഷ്കരിച്ചതാണു സംരംഭകത്വ സഹായ പദ്ധതി (ഇ എസ് എസ്).

പദ്ധതി ആർക്ക് വേണ്ടി?

2012 ഏപ്രിൽ ഒന്ന് മുതൽ പ്രവർത്തനം ആരംഭിക്കുകയോ, വായ്പ അനുവദിക്കുകയോ, കൈപ്പറ്റുകയോ ചെയ്തിട്ടുള്ള വ്യവസായ സ്ഥാപനങ്ങൾക്ക് ഈ പദ്ധതി പ്രകാരം ധന സഹായം ലഭിക്കും. ഉൽപ്പാദന സംരംഭങ്ങൾക്ക് മാത്രമാണു ഈ പദ്ധതി പ്രയോജനം ചെയ്യുക.  ബാങ്ക് വായ്പ ഇല്ലാതെ സംരംഭങ്ങൾ ആരംഭിക്കുന്നവർക്കും ഇ എസ് എസ് പ്രകാരമുള്ള ആനുകൂല്യം ലഭിക്കും. 

സാമ്പത്തിക സഹായത്തിനു പരിധിയുണ്ടോ?

നെഗറ്റീവ് ലിസ്റ്റിൽ പരാമർശിക്കാത്ത എല്ലാത്തരം ഉൽപ്പാദന സംരഭങ്ങൾക്കും ഈ പദ്ധതി പ്രകാരമുള്ള സഹായത്തിനു അർഹതയുണ്ട്.  ഒരു സംരംഭം തുടങ്ങുന്നതിനു ആവശ്യമായ സ്ഥിര മൂലധന നിക്ഷേപം പരിഗണിച്ചാണു ആനുകൂല്യങ്ങൾ നൽകുക. ഭൂമി, ഭൂമി വികസനം, കെട്ടിടം, യന്ത്ര സാമഗ്രികൾ, ജനറേറ്ററുകൾ, വൈദ്യുതീകരണ ചെലവുകൾ തുടങ്ങി നിക്ഷേപത്തിൻറ്റെ തോത് അനുസരിച്ച് പരമാവധി 30 ലക്ഷം രൂപ വരെയാണു സബ്സഡി നൽകുക.

സംസ്ഥാനത്ത് ആരംഭിക്കുന്ന മൈക്രോ, സ്മോൾ സംരംഭങ്ങൾക്ക് അവയ്ക്ക് വേണ്ടി വരുന്ന സ്ഥിര നിക്ഷേപത്തിൻറ്റെ 15 ശതമാനം പരമാവധി 20 ലക്ഷം രൂപ എന്ന കണക്കിൽ സബ്സിഡി നൽകുന്നു. എന്നാൽ വനിതകൾ, പട്ടിക ജാതി/വർഗ്ഗ വിഭാഗക്കാർ, യുവാക്കൾ (45 വയസ്സിൽ താഴെ) എന്നിവർക്ക് 20 ശതമാനവും, പരമാവധി 30 ലക്ഷം രൂപയുമാണു സബ്സിഡിയുടെ കണക്ക്.  പദ്ധതി വിഹിതത്തിൻറ്റെ 30 ശതമാനം മൈക്രോ സംരംഭങ്ങൾക്കായി നീക്കി വയ്ക്കണമെന്ന് പ്രത്യേകം നിഷ്ക്കർഷിക്കുന്നുണ്ട്. 

അധിക സബ്സിഡി ലഭ്യമാണോ?

മുൻഗണനാ വിഭാഗത്തിൽ വരുന്ന യൂണിറ്റുകൾക്കും, ഇടുക്കി, കാസർഗോഡ്, പത്തനംതിട്ട, വയനാട് എന്നീ ജില്ലകളെ പിന്നോക്ക ജില്ലകളായി കണക്കാക്കിയിരിക്കുന്നതിനാൽ ഇവിടുങ്ങളിൽ ആരംഭിക്കുന്ന വ്യവസായങ്ങൾക്കും പുതിയ സാങ്കേതിക വിദ്യ പ്രയോജനപ്പെടുത്തിയിരിക്കുന്നവയ്ക്കും 10 ശതമാനം പരമാവധി 10 ലക്ഷം രൂപ എന്ന കണക്കിൽ അധിക സബ്സിഡിയും ലഭിക്കുന്നതാണു.  

മുൻഗണനാ വിഭാഗത്തിൽ വരുന്ന സംരംഭങ്ങൾ ഏവ? 

റബ്ബർ, കാർഷിക ഭക്ഷ്യ സംസ്കരണം, റെഡിമെയ്ഡ് വസ്ത്ര നിർമ്മാണം, പാരമ്പര്യേതര ഊർജ്ജ ഉൽപ്പന്നങ്ങൾ, ബയോടെക്നോളജി, 100 ശതമാനം കയറ്റുമതി സ്ഥാപനങ്ങൾ, മണ്ണിൽ നശിക്കുന്ന പ്ലാസ്റ്റിക് ഉൽപ്പന്നങ്ങൾ, ഉപയോഗശൂന്യമായ പ്ലാസ്റ്റിക്കുകളുടെ പുനരുപയോഗ സംരംഭങ്ങൾ, ജൈവ വളം എന്നീ മേഖലകളാണു മുൻഗണനാ വിഭാഗത്തിൽ വരിക. 

ആനുകൂല്യങ്ങൾ ഒരുമിച്ച് ലഭിക്കുമോ?

ഇ എസ് എസ് പദ്ധതി പ്രകാരമുള്ള ആനുകൂല്യങ്ങൾ 3 ഘട്ടങ്ങളിലായിട്ടാണു ലഭ്യമാവുക.  സംരംഭം ആരംഭിക്കുന്നതിനു മുൻപ് തുടങ്ങാനുള്ള സഹായവും ആരംഭിച്ച് കഴിഞ്ഞാൽ നിക്ഷേപ സഹായവും മെച്ചപ്പെട്ട സാങ്കേതിക വിദ്യ സമ്പാദിച്ചാൽ സാങ്കേതിക സഹായവും നൽകുവാൻ ഇതിൽ വ്യവസ്ഥ ചെയ്യുന്നുണ്ട്.  

ഇതിൽ തുടങ്ങുവാനുള്ള സഹായം ബാങ്ക് വായ്പ എടുക്കുന്നവർക്ക് മാത്രമേ ലഭ്യമാവുകയുള്ളു.  ബാങ്ക് വായ്പയ്ക്കുള്ള അപേക്ഷ വ്യക്തമായ പ്രോജക്ട് റിപ്പോർട്ട് സഹിതം ജില്ലാ വ്യവസായ കേന്ദ്രം വഴി ശുപാർശ ചെയ്ത് ധനകാര്യ സ്ഥാപനങ്ങൾക്ക് സമർപ്പിക്കേണ്ടതാണു.  നിക്ഷേപത്തിൻറ്റെ അർഹമായ സബ്സിഡിയുടെ 50 ശതമാനം, പരമാവധി 3 ലക്ഷം രൂപയാണു അനുവദിക്കുന്നത്. 

നിക്ഷേപ സഹായത്തിനുള്ള അപേക്ഷ ഉൽപ്പാദനം ആരംഭിച്ച് ഒരു വർഷത്തിനുള്ളിൽ സമർപ്പിക്കേണ്ടതാണു.  എന്നാൽ ന്യായമായ കാരണങ്ങൾ ഉണ്ടെങ്കിൽ 2 വർഷം വരെ ഇതിൽ ഇളവ് ലഭിക്കും.  വൈവിധ്യ വൽക്കരണം, വിപുലീകരണം, ആധുനിക വൽക്കരണം എന്നിവ നടപ്പാക്കിയ സ്ഥാപനങ്ങൾക്കും സഹായം ലഭിക്കും.  സ്ഥിര നിക്ഷേപത്തിന്മേൽ നടത്തിയ അധിക നിക്ഷേപത്തിനാണു ഇത് ലഭിക്കുക. 

ഇങ്ങനെയുള്ള ആനുകൂല്യങ്ങൾക്ക് യന്ത്ര സാമഗ്രികളുടെ നിക്ഷേപത്തിൽ 25 ശതമാനത്തിൻറ്റേയും വിപുലീകരണത്തിലുള്ള ഉൽപ്പാദന ശേഷിയിൽ 25 ശതമാനത്തിൻറ്റേയും വർദ്ധന ഉണ്ടായിരിക്കണം. 

സാങ്കേതിക സഹായമാണു മൂന്നാം ഘട്ടം. പുതിയ സാങ്കേതിക വിദ്യ ഉപയോഗപ്പെടുത്തുന്നതിനാണിത്.  ആറ് മാസത്തിനുള്ളിൽ ഇതിനുള്ള അപേക്ഷ സമർപ്പിക്കണം.  പുതിയ സംരംഭങ്ങൾക്കും നിലവിലുള്ള സംരംഭങ്ങൾക്കും ഈ ആനുകൂല്യം ലഭിക്കും.  പരമാവധി 10 ലക്ഷം രൂപ വരെയാണു അധിക സഹായമായി ലഭിക്കുക.  CFTRI, CSIR, DFRL, DRDO, ICAR, CTCRI, KVK, Rubber Board തുടങ്ങിയ സർക്കാർ അംഗീകൃത സ്ഥാപന്നങ്ങളിൽ നിന്നും ലഭ്യമാകുന്ന സാങ്കേതിക വിദ്യകൾക്കാണു സഹായം ലഭിക്കുക.  ഗവണ്മെൻറ്റ് എഞ്ചിനിയറിങ്ങ് കോളേജ് പോലുള്ള സ്ഥാപനങ്ങൾ വ്യവസായ പുരോഗതിക്ക് ഉതകുന്ന സാങ്കേതിക വിദ്യ വികസിപ്പിച്ചെടുത്താലും ഈ ആനുകൂല്യത്തിനു അർഹരാണു.  മെച്ചപ്പെട്ട പാക്കേജിങ്ങ് സംവിധാനം, ഊർജ്ജോൽപ്പന്ന സംരക്ഷണ സംവിധാനങ്ങൾ, എന്നിവയ്ക്കും ഇത് പ്രകാരമുള്ള സഹായം ലഭിക്കും.  

എന്തെങ്കിലും കരാർ ഉണ്ടോ?

നിക്ഷേപ സഹായം സ്വീകരിക്കുന്ന സ്ഥാപനം ഉൽപ്പാദനം ആരംഭിച്ച തീയതി മുതൽ അടുത്ത അഞ്ച് വർഷം തുടർച്ചയായി പ്രവർത്തിപ്പിച്ച് കൊള്ളാമെന്ന് മുദ്രപ്പത്രത്തിൽ സമ്മത പത്രം നൽകേണ്ടതുണ്ട്. 

 

എവിടെയാണു ബന്ധപ്പെടേണ്ടത്?

വ്യവസായ വാണിജ്യ ഡയറക്ട്രേറ്റ്, ജില്ലാ വ്യവസായ കേന്ദ്രങ്ങൾ, താലൂക്ക് വ്യവസായ ഓഫീസുകൾ, ബ്ലോക്കുകളിലെ വ്യവസായ വികസന ഓഫീസർമാർ എന്നിവിടങ്ങളിൽ അപേക്ഷ സമർപ്പിക്കാവുന്നതാണു.