ഒരു സംരംഭം തുടങ്ങുവാന്‍ പണം എവിടെ നിന്നും
ലഭിക്കുമെന്ന് ചിന്തിക്കുമ്പോഴാണ് വിവിധ ധനകാര്യ സ്ഥാപനങ്ങളിലേക്ക് അന്വേക്ഷണം
നീളുന്നത്. കാരണം സ്വന്തം പണം കൊണ്ട് മാത്രം സ്ഥാപനം ആരംഭിക്കുകയെന്നത്
എല്ലായ്പ്പോഴും പ്രായോഗികമല്ലല്ലോ. പലര്‍ക്കും ഏറ്റവും പ്രയാസമേറിയതാണ് ഈ ഘട്ടം. എന്നാല്‍
തുടങ്ങുവാന്‍ ആഗ്രഹിക്കുന്ന സംരംഭത്തെക്കുറിച്ച് വ്യക്തമായ അവബോധവും തികഞ്ഞ ആത്മ
വിശ്വാസവും എല്ലാറ്റിലുമുപരി നല്ലയൊരു പ്രൊജക്ട് റിപ്പോര്ട്ടും കയ്യിലുള്ളവര്‍ക്ക്
ഈ ഘട്ടം അനായസമായി തരണം ചെയ്യുവാന്‍ കഴിയും. അതായത് തുടക്കത്തിലേ തന്നെ അവസാനവും
മുന്‍പില്‍ കാണുവാനുള്ള കഴിവുണ്ടാവണം
ഒരു പ്രോജക്ട് റിപ്പോര്‍ട്ടില്‍
എന്തെല്ലാം ഉണ്ടാവണം?
വ്യക്തമായി തയ്യാറാക്കിയ ഒരു പ്രോജക്ട് ആണ്
ഏതൊരു സംരംഭത്തിന്‍റേയും വിജയത്തിലേക്കുള്ള ആദ്യ ചവിട്ടു പടി. തന്‍റെ മുന്‍പിലുള്ള
ലക്ഷ്യങ്ങള്‍ കൃത്യമായി വിശദീകരിക്കുന്നതായിരിക്കണം ഒരു നല്ല പ്രോജക്ട് റിപ്പോര്‍ട്ട്.
പ്രൊജക്ടിന്‍റെ വിജയ സാധ്യതകള്‍ അവലോകനം ചെയ്യുന്ന ഒരാള്‍ ചോദിക്കാവുന്ന
ചോദ്യങ്ങള്‍ക്ക് യുക്തി സഹമായ ഉത്തരങ്ങള്‍ ഈ റിപ്പോര്‍ട്ടിലുണ്ടാവണം.
സംരംഭകന്‍റെ യോഗ്യതകള്‍, മുന്‍പരിചയം, സംരംഭം തിരഞ്ഞെടുക്കുവാനുള്ള കാരണങ്ങള്‍
·
പ്രൊജക്ടിന്‍റെ ലക്ഷ്യവും വ്യാപ്തിയും
·
ഉല്‍പ്പന്നത്തിന്‍റെ സ്വഭാവം, ഗുണങ്ങള്‍, ഉപയോഗം
·
വിപണി സാധ്യതകള്‍
·
അടിസ്ഥാന സൌകര്യങ്ങളുടെ ലഭ്യത
·
ഉല്‍പ്പാദനം, അവലംബിക്കുന്ന സാങ്കേതിക വിദ്യ
·
വിപണന മാര്‍ഗ്ഗങ്ങള്‍
· സ്ഥിര നിക്ഷേപവും പ്രവര്‍ത്തന മൂലധനവുമടക്കം പ്രൊജക്ട് ആരംഭിക്കുന്നതിനാവശ്യമായ
പദ്ധതി (Cost of Project)
·
ധന സമാഹരണം (Source of
Finance)
· ധനാഗമ മാര്‍ഗ്ഗങ്ങളെപ്പറ്റിയുള്ള വിശകലനം (Profitability/Cash flow statement)
·
വായപ തിരിച്ചടവിനുള്ള പദ്ധതി (Loan Repayment Statement)
ബാങ്ക് വായ്പ എങ്ങനെ നേടാം?
ഏതൊരു സംരംഭത്തില്‍ പണം മുടക്കുന്നയാളിന്‍റെ
ലക്ഷ്യം ന്യായമായ പ്രതിഫലമാണ്. ഇതുറപ്പാക്കണമെങ്കില്‍ പദ്ധതി സാങ്കേതികമായും
സാമ്പത്തികമായും ഭദ്രമായിരിക്കണം. മാത്രവുമല്ല വായ്പ അനുവദിക്കുന്ന സ്ഥാപനത്തിന്
ഇത് ബോധ്യമാവുകയും വേണം. നല്‍കുന്ന വായ്പ ഗഡുക്കളായി തിരിച്ചടക്കുവാന്‍
സാധിക്കുമോയെന്ന് ധനകാര്യ സ്ഥാപനങ്ങള്‍ ഗഹനമായി പരിശോധിക്കുകയും ചെയ്യും.
ധനകാര്യ സ്ഥാപനങ്ങളുടെ വിവിധ വായ്പാ
പദ്ധതികളെപ്പറ്റിയും വിവിധ ഏജന്‍സികള്‍ നല്‍കുന്ന സബ്സിഡി, മാര്‍ജിന്‍ മണി വായ്പ
തുടങ്ങിയ ആനുകൂല്യങ്ങളെപ്പറ്റിയും ഏകദേശ ധാരണ സംരംഭകന് മുന്‍കൂറായി ഉണ്ടാവണം. കൂടാതെ ഉല്‍പ്പാദനം,
വിപണനം, നിക്ഷേപം തുടങ്ങിയവയെപ്പറ്റി ഏകദേശ ധാരണ ഉണ്ടായിരിക്കണം. ഇവ ഉള്‍ക്കൊണ്ട് പദ്ധതി
തയ്യാറാക്കുകയാണെങ്കില്‍ അത് പണം വായ്പ നല്‍കുന്ന സ്ഥാപനത്തിനോ പദ്ധതിയില്‍
നിക്ഷേപം നടത്തുവാനുദ്ദേശിക്കുന്നവര്‍ക്കോ കാര്യങ്ങള്‍ വേഗം ഗ്രഹിക്കുവാന്‍
കഴിയും. ധനകാര്യ സ്ഥാപനങ്ങളില്‍ സാധാരണ അനുഭവപ്പെടാറുള്ള കാലതാമസവും നടപടിക്രമങ്ങളും
കുറയ്ക്കുവാനും സാധിക്കും.
ജാമ്യ രഹിത വായ്പ
ചെറുകിട സംരംഭങ്ങള്‍ക്ക് അഞ്ച് ലക്ഷം രൂപ വരെ
ജാമ്യ (Security) മില്ലാതെ വായ്പ നല്‍കുവാന്‍ ബാങ്കുകള്‍ക്ക് നിര്‍ദ്ദേശമുണ്ട്.
ക്രെഡിറ്റ് ഗാരന്‍റി ട്രസ്റ്റ് (CGTMSE) മുഖേന മൊത്തം വായ്പയുടെ 75 ശതമാനം പരമാവധി 37.5 ലക്ഷം
വരെ നിബന്ധനകള്‍ക്ക് വിധേയമായി ഗാരന്‍റി നല്‍കുന്ന സംവിധാനം നിലവിലുണ്ട്.
നല്ല പ്രൊജക്ട് ആശയങ്ങള്‍ കൃത്യമായ പദ്ധതിയുടെ
അടിസ്ഥാനത്തില്‍ നടപ്പിലാക്കുവാന്‍ മുന്നോട്ട് വരുന്ന സംരംഭകരെ സ്വാഗതം ചെയ്യുന്ന
ഒരു ബാങ്കിങ്ങ് സംവിധാനം ഇപ്പോഴുണ്ട്. ആയതിനാല്‍ സംരംഭകര്‍ ഒരു പ്രൊഫഷണല്‍ സമീപനം
അവലംബിച്ച് കൊണ്ട് അത് പ്രയോജനപ്പെടുത്തുകയാണ് വേണ്ടത്.
